DILI, 04 novembru 2024 (TATOLI)–Institutu Nasionál Seguransa Sosiál (INSS) husu ba traballadór setór públiku atu rejista aan iha rejime seguransa kontribuitivu seguransa sosiál iha INSS.
Prezidente INSS, Arlindo Pinto, hateten komesa aprovasaun rejime kontribuitivu ba liña ministeriál hotu-hotu, insitutuisaun sira tenke hatama dokumentu ba deklarasaun renumerasaun inklui inskreve traballador sira tama iha sistema seguransa sosiál.
“Husi 01 to’o 15 novembru, hotu-hotu tenke kumpre rezolusaun ne’ebé iha no fó informasaun ba parte rekursu umanu iha pontu fokál bele subemte dokumentu ne’ebé daudaun ne’e ami tau hela iha portál transparénsia seguransa sosiál hodi bele prienxe,” Prezidente INSS, Arlindo Pinto, hateten ba jornalista sira liuhusi konferénsia imprensa, iha Caicoli.
Nia garante katak INSS sei aprezenta karta kona-ba rezolusaun Konsellu Ministru nian ba ministériu hotu-hotu, ba ajénsia no institutu públiku hodi bele kumpre.
Arlindo Pinto hateten, iha instituisaun Estadu hamutuk 81 no 21 de’it mak inskreve aan iha INSS iha fundu rezerva sosiál liuhusi Ministériu Solidariedade Sosiál no Inkluzaun (MSSI), no insitituisaun sira hotu tenke kumpre rezolusaun ne’ebé aprova iha Konsellu Ministru.
Tuir dadus husi INSS, traballadór setór públiku ne’ebé rejista iha sistema seguransa sosiál iha rihun 73 no empregadór iha rihun 84.
Traballadór lubuk ida-ne’ebé mak seidauk inskreve iha seguransa sosiál, maioria seidauk inskreve iha sistema seguransa sosiál maske kafa fulan ko’a hela osan.
INSS mós relata dadus traballadór setór públiku hamutuk rihun 2.300-resin mak asesu ona rejime pensaun seguransa sosiál ho totál kapitalizasaun ba fundu rezerva seguransa sosiál iha 2024 nian hamutuk millaun $250.
Iha projesaun ba tinan 2025, iha totál fundu rezerva seguransa sosiál hamutuk millaun $300.
Jornalista : Jesuína Xavier
Editór : Cancio Ximenes
