OÉ-CUSSE, 04 Novembru 2024 (TATOLI) – Númeru kadu infetadu ba VIH/Sida ne’ebé Servisu Saúde iha Rejiaun Administrativa Espesiál Oé-Cusse Ambeno (RAEOA) rejista to’o Outubru 2024 ne’e sa’e ba 78.
“Moras HIV Oé-Cusse agora maka’as kompara ho tinan hirak bá kotuk ne’e númeru ki’ik iha kazu 26, agora sa’e ona ba 78”, Sekretáriu Rejionál Asuntu Saúde, Luís de Jesus Neno, informa iha ámbitu avaliasaun ba progresu Servisu Saúde husi trismestre dahuluk to’o datoluk iha otél Lifau, ohin.
Nia esplika katak kazu 78 ne’e rekolla liuhusi ezaminasaun bainhira profisionál saúde sira halo screening masál no balun deteta iha instalasaun saúde sira bainhira hasai raan iha postu saúde, sentru saúde no Ospitál Referénsia Oé-Cusse.
Notísia relevante: Saúde Oé-Cusse fó hanoin ba estudante sira prevene-aan hosi HIV-SIDA
“Númeru ida-ne’e detetadu liuhusi teste raan iha fasilidade saúde sira, inklui sede suku sira, maibé sira-ne’ebé seidauk deteta sei kontinua livre hela, espera katak sira bele koopera hodi hetan tratamentu”, nia apela.
Atu prevene kazu sira-ne’e, Servisu Saúde Oé-Cusse sei kontinua implementa programa promosaun saúde iha nivel suku no aldeia sira atu konsensializa sidadaun hotu hodi kuidadu aan.
“Polítika ne’e iha hala’o ona, agora sei kontinua no serbisu hamutuk ho autoridade lokál no komunidade sira atu hakbesik ba instalasaun hodi teste raan, nune’e bele hatene ita-nia moris ne’e hetan moras ka la’e”, nia dehan.
Nia lembra katak, iha fulan-Jullu ne’e, Institutu Nasionál Kombate VIH/Sida, Institutu Públiku (INCSIDA, I.P) hala’o ona divulgasaun informasaun iha sub-rejiaun Pante Makasar, nune’e iha futuru sei kontinua bá sub-rejiaun seluk atu hamutuk prevene-aan tanba moras ne’e hada’et liuhusi relasaun seksuál livre.
Notísia relevante: INCSIDA rejista kazu HIV-SIDA 1.704, Oé-Cusse okupa fatin dahaat
Rekorde katak, Servisu Saúde Oé-Cusse rejista husi 2013 to’o 2022 kuaze ema na’in 10-resin mak hakotu ona vida ho moras HIV/Sida.
Jornalista: Abílio Elo Nini
Editora: Maria Auxiliadora
