OÉ-CUSSE, 11 dezembru 2023 (TATOLI – Servisu Saúde Rejiaun dministrativa Espesiál Oé-Cusse Ambeno (RAEOA), sensibiliza impaktu moras HIV-SIDA ba estudante sira iha Eskola Tékniku Vokasionál (ETV) Palaban.
“Ohin servisu saúde rejionál liuhosi programa hada’et hanesan HIV-SIDA nian, ita hala’o sensibilizasaun kona-bá moras hada’et sira, liuliu ba HIV-SIDA, ba iha eskola tékniku vokasionál Palaban,” Diretora Servisu Saúde Oé-Cusse, Lolita do Santos, ba jornalista sira iha Oé-Cusse.
Objetivu hosi sensibilizasaun ne’e, atu nune’e estudante sira iha koñesimentu kle’an liután, kona-bá saida maka moras HIV-SIDA nia hada’et ne’e oinsá no oinsá atu prevene.
“Importante tebes tanba ita-nia estudante sira hanesan futuru nasaun nian, entaun importante ba sira atubele hatene informasaun ida-ne’e, nune’e sira-bele prevene-aan sira-nia aan rasik hosi moras HIV-SIDA,” nia informa.
Notísia relevante: Kazu infetadu HIV-SIDA iha Oé-Cusse sa’e ba 60
Hafoin halo sensibilizasaun, servisu saúde mós halo testu raan direita ba estudante sira-ne’ebé maka partisipa iha sensibilizasaun inklui komunidade sira, depois halo mós kontrolu, parte programa halo kontrolu no halo monitorizasaun mós ba pasiente infetadu sira.
“Ida-ne’e maka servisu saúde rejionál hala’o, tuir programa moras hada’et nian, sempre halo monitorizasaun ba planu hotu-hotu, liuliu ba moras HIV-SIDA nian, nune’e ita bele hatene oinsá ita-nia komunidade, liuliu sira-ne’ebé moras HIV-SIDA, nia tratamentu sira, kona-bá hemu ai-moruk ne’e reguladu ka lae,” nia katak.
Tanba dalaruma ema-ne’ebé moras HIV-SIDA muda fatin ba iha fatin seluk, ida-ne’e maka responsável servisu saúde rejionál hatama iha planu kada trimestral no sempre hala’o ba iha sub-rejiaun haat.
Carlos Poto, nu’udar profesór iha eskola ETV Palaban, agradese ba servisu saúde Oé-Cusse, tanba hili eskola ETV Palaban, hala’o sensibilizasaun kona-bá moras hada’et sira, hodi hasa’e koñesimetnu ba estudante sira.
“Ami kontente tanba ami iha ETV Palaban, laiha disiplina kona-bá biolojia atu aprende kona-bá moras sira, afeta ba ita-nia isin lolon, ne’ebé liuhosi sensibilizasaun ne’e, ami agradese ba servisu saúde, tanba presiza fo hanoin beibeik ba estudante sira,” nia orgullu.
Notísia relevante:RAEOA realiza cross border meeting ho TTU prevene moras hada’et iha liña fronteira
Jornalista: Abílio Elo Nini
Editór: Evaristo Soares Martins
