BOBONARO, 05 novembru 2024 (TATOLI) – Sekretariadu Tékniku Administrasaun Eleitorál (STAE), tersa ne’e halo abertura implementasaun atividade Resensiamentu Eleitorál, Atualizasaun Baze de Dadus (RE-ABD) produsaun kartaun eleitorál ho baze Biométriku iha Munisípiu Bobonaro.
Sistema biométriku nu’udar medida ida-neʼebé STAE introdús hodi identifika eleitór sira-nia autentifikasaun pesoál liuhosi kódigu karaterístika fíziku iha impresaun dijitál, sistema ne’e implementa atu moderniza sistema resensiamentu eleitorál ba dijitál, hasa’e grau akurasaun dadus ema idak-idak nian, evita fraude manipulasaun dadus eleitorál ne’ebé bele implika ba iha prosesu eleisaun tuir mai.
Notísia relevante: STAE introdús sistema resenseamentu eleitorál biométriku iha Bobonaro
“Sistema ida-ne’e ita atu fasilita halo limpeza ba ita-nia eleitór sira ne’ebé la ativu tiha ona, depois próximu eleisaun sira-ne’e ita hela ho dadus ne’ebé fresku,” Diretór Jerál STAE, Elviro Fernandes Moniz, informa iha salaun STAE Bobonaro.
Nia dehan, bainhira eleitór sira la renova eleitorál ba kartaun Biométriku governu sei hasai rezolusaun ida hodi lori dadus hirak-ne’e ba arkivu.
“Ne’e signifika bainhira o mai fali deklara dehan ha’u maka ne’e ho naran númeru hanesan foin bele, mas ita la renova dalaruma dadus laiha sistema dalaruma ba rejistu hanesan eleitór foun ne’ebé ho ninia rekizitu ne’e dalaruma sei todan liután.”
Diretór ne’e dehan, provizóriu atendimentu sei sentraliza iha kapitál munisípiu de’it, tanba envelope fiskál 2025 labele responde planu STAE nia atu halo atendimentu to’o nível postu, suku no rai-li’ur.
“Ita nafatin hanesan faze ida teste, iha limitasaun, ita fó prioridade ba ita-nia eleitór no autoridade sira, atu sira bele fasilita STAE iha divulgasaun informasaun, ita tenke hatudu prova dehan kartaun mak hanesan ne’e, modelu hanesan ne’e, kartaun nia funsaun hanesan ne’e bele atrai eleitór sira mai renova sira-nia kartaun,” nia hateten.
Nia husu ba autoridade munisípiu Bobonaro no líder komunitária sira atu hatutan informasaun ba komunidade nune’e bele hakbesik-aan mai edifísiu STAE Bobonaro atu nune’e bele atinje tarjetu ne’ebé governu hakarak katak tinan 2026 eleitór 90% tenke asesu ona kartaun Biométriku.
“Nune’e bele sai nu’udar sasukat ida ba ita atu avansa ho dadus ida ne’e ba próxima eleisaun ka lae, ida-ne’e mós sai rekizitu ida atu deside númeru kompozisaun membru parlamentu munisípiu nia mak dadus eleitór, bainhira eleisaun kámara munisípal,” nia katak.
Nia fó ezemplu, 50% nia implikasaun ne’e ba númeru, se kaer dadus ida-ne’e númeru deputadu ne’e sei menus, ezemplu lei poder lokál artigu 51 hateten menus husi 50% iha 13 de’it tuir loloos ita iha 17 deputadu.
Sekretáriu Autoridade Munisípiu Bobonaro ba Asuntu Administrasaun no Finansa, Domingos da Costa, konsidera ho implementasaun sistema ne’e governu hatudu pasu pozitivu ida oinsá dijitaliza kartaun eleitorál ho baze biométriku.
Tuir nia, ida ne’e hanesan servisu boot ida ba autoridade munisípiu no líder komunitária sira oinsá atu divulga informasaun ba komunidade sira atubele mai revona kartaun ba sistema biométriku.
“Tanba ida ne’e mós kritéria ida atu ba eleisaun munisipál, sé ita Bobonaro ema rihun 70 liu mak hetan ona ita pasa ona ba eleisaun munisipál, maibé ha’u fiar katak buat hotu sei halo ho di’ak, atu ita-nia mehi bele sai realidade,” nia informa.
Tuir dadus, STAE eleitór rejista iha munisípiu Bobonaro hamutuk na’in-75,351 kompostu hosi mane 38,731 no Feto 36,620. Husi totál ne’e na’in-242 mak asesu ona kartaun biométriku, falta na’in-75,109 mak seidauk.
Notísia relevante: Notariadu Bobonaro halo rejistu movel ba idozu no EhD iha Balibo
Jornalista: Sérgio da Cruz
Editór: Evaristo Soares Martins
