BOBONARO, 05 novembru 2024 (TATOLI) – Diresaun Konservatóriu Servisu Rejistu Notariadu, Munisípiu Bobonaro, implementa programa atendimentu movel hodi fasilita Idozu no Ema ho Defisiénsia (EhD) sira iha postu administrativu Balibó trata dokumentu Billete Identidade (BI) no Sertidaun Nasimentu (RDTL).
Atividade ne’e realiza iha postu administrativu Balibó, hahú husi suku Cova, segunda loron (04/11) no ohin, tersa loron (05/11) kontinua iha suku Leohitu no sei kontinua ba suku seluk durante semana ida.
Programa ne’e konklui ona iha postu administrativu Atabae ho totál suku haat hanesan; Atabae, Hataz, Rairobo no suku Aidabaleten.
Diretór Konservatóriu Servisu Rejistu Notariadu, Munisípiu Bobonaro, Marciano Mali Loe, informa, atendimentu ne’e fó liu prioridade ba idozu no EhD tanba durante ne’e sira difisíl atu mai direita edifísiu iha Maliana.
Notísia relevante: Notariadu Bobonaro sei atende komunidade trata BI-Sertidaun RDTL iha suku
“Ami haree kondisaun ita-nia avo sira idozu no defisiénsia sira, durante ne’e parte sosiál fó hanoin mai ami katak sira la asesu dokumentu sira-ne’e tanba balu la’o la araska, depois sira atu sa’e karreta mós ladi’ak, motorizada mós ladi’ak, entaun ho biban ida-ne’e ita mós halo programa iha postu Atabae remata ona, agora komesa fali iha postu Balibo,” nia informa ba TATOLI, tersa ne’e.
Marciano esplika, liuhusi programa ne’e bele fasilita Sekretariadu Tékniku Administrasaun Eleitorál (STAE) hahú halo atendimentu Resensiamentu Eleitorál no Atualizasaun Baze Dadus ho baze Biométriku tanba maioria idozu no EhD iha postu administrativu Atabae no Balibó asesu hotu ona dokumentu BI no RDTL.
Kona-bá atendimentu jerál iha postu parte Notariadu Bobonaro sei koordena ho diresaun jerál Ministériu Justisa.
Diretór Komisaun Nasionál Eleisaun (CNE, sigla portugés), Munisípiu Bobonaro, Juvito Ramos, informa, parte rejistu Notariadu presiza hakbesik atendimentu to’o baze tanba durante ne’e liuhusi atividade edukasaun sívika CNE identifika katak komunidade, liuliu idozu no EhD barak laiha dokumentu komprovativu atu halo RE-ABD iha sistema STAE nian.
“Ita atu hetan dokumentu tolu ne’e presiza ba Notariadu, maibé Notariadu konsentra de’it iha munisípiu, entaun ita-nia inan-aman sira-ne’ebé iha área rurál sira la’o labele atu mai munisípiu, entaun susar ba sira atu hetan dokumentu sira-ne’e, husi parte STAE ba oin presiza koordena ho Notariadu atubele la’o hamutuk,” nia katak.
Enkuantu durante atendimentu Notariadu prodús ona BI no RDTL ba idozu no EhD iha Atabae hamutuk na’in 300-resin no iha suku Cowa, postu administrativu Balibó 22.
Tuir planu, husi Rejistu Notariadu Munisípiu Bobonaro tinan oin sei realiza mós atividade ne’e iha postu administrativu seluk ne’ebé pertense ba munisípiu Bobonaro.
Notísia relevante: Komunidade kestiona Notariadu Bobonaro kona-bá sistema atendimentu BI no Sertidaun RDTL
Jornalista : Sérgio da Cruz
Editór : Evaristo Soares Martins
