BOBONARO, 22 novembru 2023 (TATOLI) – Komunidade sira preokupa no kestiona maka’as atendimentu servisu hosi Diresaun Servisu Munisipál Konservatóriu Rejistu Notariadu (DSMCRN, sigla portugés) Munisípiu Bobonaro, kona-ba prosesu atu trata Billete Identidade (BI) no Sertidaun RDTL tanba sistema lenta no prosesu kleur liu.
Abitante suku Genulai, postu administrativu Cailaco, Anhelos Bau Mau, informa sira mai hosi Cailaco to’o edifísiu DSMCRN Bobonaro tuku 08:00 dadeer ne’e, maibé ema barak mak hamriik liña forma sena-malu, tama ladi’ak.
Nune’e mós tama to’o sala atendimentu sei liuhosi prosesu lubuk ida tan, labele foti kedas dukumentu iha loron ida nia laran.
“Ami mai urus BI no RDTL, labele tunda-tunda, agora ami mai urus hotu tiha atu foti la’e, sei semana oin, ami mai tiha dehan loron rra tan, depois mai tiha la foti, halo ami povu ne’e la’o ba mai ne’e ami kolen, ami hosi dook mak mai ne’e, estrada mós ladi’ak. Sira dejan tan loron hitu tán, depois mai tán la foti, ne’e ami senti araska,” nia ko’alia iha edifísiu DSMCRN Bobonaro, tersa ne’e.
Ho problema ne’e, nia husu ba DSMCRN munisípiu Bobonaro atu halo atendimentu to’o nível postu administrativu sira núne’e fasilita komunidade sira la’o besik no foti lalais sira-nia dukumentu ne’ebé presiza.
“Se lae ita-nia inan-aman sira la’o ladi’ak ne’e lakohi mai, tanba estrada aat, mak mate iha dalan hlo nusá. Ezemplu, ohin ami mai tau tiha dukumentu, depois meudia deskansa hotu, lokraik ami mai demora fali mós ladi’ak, ita-nia ba okos tula fali ema ida mai uluk nia mak ba leten, ida-ne’e mak ami sente araska liu,” nia katak.
Abitante Abílio Coli Soares, konsidera prosesu atendimentu tarde ne’e difikulta tebes komunidade ne’ebé presiza dukumentu urjénsia.
“Ha’u haree sira-nia atendimentu ne’e di’ak, problema mak ita mai hein-malu, dudu-malu. Ezemplu, ha’u mai urjente karik labele tama liu, tanba sei kleur iha oin, tanba ne’e ha’u rekomenda ba governu sé bele tenke ba suku ka postu, atu ami trata ami-nia dokumentu ne’e lalais,” nia fó hanoin.
Hatán bá preokupasaun ne’e, Diretór DSMCRN Munisípiu Bobonaro, Marciano Mali Loe, esklarese ne’e tanba halo atendimentu ho númeru boot ne’ebé akumula komunidade iha postu administrativu neen.
DSMCRN planeia atu halo atendimentu iha baze ne’e trasa dede diretór sesante nia mandatu, maibé seidauk bele implementa razaun tanba autoridade postu no suku sira seidauk fornese dadus mai.
“Ami-nia pedidu ba tia kedas dia 31 jullu momentu señor diretór sesante nia kedas, ita hein dadus ne’e mai kompletu ona, submete ba nasionál, ami halo planu atu tún ba postu, suku no aldeia no ba liu área rurál sira, maibé ami atu halo Billete Identidade no rejistu kriminál ne’e, ami uza sistema online, entaun presiza eletrisidade no liña internete di’ak,” nia argumenta.
Notísia relevante: DSMCRN Bobonaro hahú halo atendimentu pasaporte
Jornalista: Sérgio da Cruz
Editór: Evaristo Soares Martins
