DSMCRN Bobonaro hahú halo atendimentu pasaporte
BOBONARO, 22 novembru 2023 (TATOLI) – Diresaun Servisu Munisipál Konservatóriu Rejistu Notariadu (DSMCRN, sigla portugés) munisípiu Bobonaro, kuarta ne’e hahú hosi tuku 08:00 halo atendimentu ba komunidade sira-ne’ebé atu trata no renova pasaporte Timor-Leste.
Diretór DSMCRN munisípiu Bobonaro, Marciano Mali Loe, esplika, bazea ba despaxu hosi diresaun nasionál prosesu atendimentu kada loron simu ema na’in-50.
Notísia relevante: Aban, Servisu Notariadu Covalima atende sidadaun trata pasaporte komum
“Ami foin atendimentu ohin dia 22, ne’e mak agora ita-nia maluk sira mai forma hela iha dadeersan ne’e, agora kolega simu hela, ami iha-ne’e atendimentu kada loron tarjentu 50. Ami sente ami sei bele atende ami simu tán 10, ida-ne’e la ba despaxu sira-ne’e, ba loos ita-nia maluk komunidade sira,” nia informa ba jornalista sira iha kna’ar Maliana.
Nia aprofunda, sistema atendimentu ne’e dijitál tanbá ne’e DSMCRN simu de’it dokumentu, hafoin aplikante sira sei ba selu iha Banku Nasionál Komersiu Timor-Leste (BNCTL, sigla portugés), maibé prosesu ba produsaun sei hala’o iha nasionál.
“Sira lori fali resivu mai iha-ne’e, ami tau hamutuk ho aplikante sira-nia dokumentu, depois manda ba nasionál, orsida prosesu ba loron 10 nian, to’o besik atu loron 10 kolega operadór sira ba foti iha nasionál, mai to’o tiha mak ami foin fó-sai,” nia dehan.
Abitante hosi suku Lahomea, Sérgio Soares, informa, maske durante ne’e hein kleur, maibé hanesan sidadaun ida sente kontenti no agardese ba IX Governu Konstituisionál liuhosi Ministériu Justisa ne’ebé halo esforsu maka’as to’o ohin loron kaderneta pasaporte bele to’o mai hodi halo atendimentu hanesan bainbain.
“Ami nafatin husu ba Ministériu Justisa atu nafatin loke ba komunidade hotu iha Timor laran tomak, tanba kaderneta pasaporte ne’e sai xave ba nasaun, tanba liuhosi kaderneta pasaporte ita bele asesu ba nasaun oinoin,” nia katak.
Tuir observasaun Agência Tatoli iha terrenu nota katak komunidade, estudante liuliu joven sira entusiazmu tebes forma iha liña atendimentu hahú kedas iha tuku 07:00 dadeer.
Notísia relevante: Governu aprova empreza fornese kaderneta pasaporte 73.150
Jornalista: Sérgio da Cruz
Editór: Evaristo Soares Martins
