DILI, 06 novembru 2024 (TATOLI)–Vigáriu Judisiál Tribunál Eklesiástiku Arkidioseze Metropolitana Dili, Pe. Graciano Santos Barros, hateten konstrusaun ba igreja Parokia Aimutin sei iha prosesu fiskalizasaun, molok kontinua halo konstrusaun ba obra ne’e.
Notísia Relevante: Presiza tan millaun $1,5 hodi finaliza konstrusaun igreja Aimutin
Padre esplika, prosesu fiskalizasaun ba obra liuliu parte tékniku sira, arkidioseze Dili no Konferénsia Episkopál Timorense (CET, sigla portugés) entrega ona ba iha Ajénsia Dezenvolvimentu Nasionál (ADN), Gabinete Apoiu Sosiedade Sivil ho pároku Aimutin hodi haree ba ezekusaun orsamentu no obra fízika hodi kontinua halo konstrusaun maibé molok kontinua obra ne’e, tékniku ADN tenke haree didi’ak ida-ne’e.
“Fiskalizasaun ne’e atu haree obra fízika ne’e korresponde ba ezekusaun orsamentu no tuir Planta no kadernu enkargu ka bill of Quantity (BoQ) ba igreja Aimutin iha obra fízika. Buat atu hatene balansu ba uzu orsamentu totál no progresu konstrusaun, iha balansu ka lae,” Pe. Graciano Santos Barros, hateten ba Agência TATOLI, iha sede episkopál Lecidere.
Tuir nia, obra la’ós hetan suspensaun maibé atu harii igreja ne’e orsamentu mai husi Governu, entaun to’o tempu orsamentu hotu ne’e obra konstrusaun mós para.
“Amu bispu husu parte tékniku ADN, Gabinete Sosiedade Sivil no amu pároku hodi haree ida ne’e to’o hetan rezultadu uzu orsamentu bele responsabiliza ba balansu ba orsamentu ne’ebé tau ona, entaun ita bele kontinua,” nia hateten.
Parte igreja entrega hotu ona ba sira, tanba amu pároku mak asina akordu ho kompañia hamutuk ho Gabinete sosiedade sivil no akompaña husi AND.
Orsamentu ba iha konstrusaun igreja Aimutin aloka diretamente ba iha ne’ebá husi Gabinete Apoiu Sosiedade Sivil.
“Obra hahú tinan hirak liuba, fonte finanseiru mai husi gabinete sosiedade sivil, la liu husi subvensaun Konferénsia Episkopál Timorense,” nia dehan.
Notísia Relevante: Dom Vírgilio husu SASCAS no ADN fiskaliza progresu konstrusaun Igreja Aimutin
Jornalista : Jesuína Xavier
Editór : Cancio Ximenes
