OÉ-CUSSE, 07 Novembru 2024 (TATOLI) – Sentru Juventude Rejiaun Oé-Cusse (CJRO, sigla portugés) prepara atividade haat ba selebrasaun Loron Nasionál Juventude 12 Novembru 2024 iha Rejiaun Administrativa Espesiál Oé-Cusse Ambeno (RAEOA).
“Komemorasaun ne’e ho atividade prinsipál haat mak semináriu ba joven sira, kalan reflesaun, misa iha igreja tuan no kari ai-funan iha semitériu”, Diretór CJRO, Dionísio Taek, informa ohin.
Nia hateten semináriu ne’e sei hala’o iha loron 11 Novembru 2024 hodi promove mós diskusaun aberta, kontinua iha kalan reflesaun sunu lilin no reza no loron 12 dadersán misa iha igreja, depois kontinua kedas bá karii ai-funan iha semitériu bairru Krús.
Notísia relevante: MJDAK aloka rihun $100 hodi komemora loron Nasionál Juventude no Masakre Santa Cruz
“Agora, ami sei identifika hela oradór sira atu ko’alia iha semináriu ne’e, tanba partisipante ne’e sei mai husi estudante nivel sekundáriu sira, komunidade, autoridade lokál no autoridade RAEOA, inklui seguransa sira”, dehan.
Kona-ba orsamentu, Ministériu Juventude Desportu, Arte no Kultura mak apoia ona ho montante $2.500 hodi fahe ba sub-rejiaun Oésilo, Pássabe, Nítibe no Pante Makasar.
“Ita fahe kada sub-rejiaun hetan hetan $600, tanba komemorasaun ne’e konsentra iha idak-idak nia ub-rejiaun”, adianta.
Selebrasaun Loron Nasionál Juventudeiha tinan ne’e ho tema “Orgullu ho Ita-Nia Istória no Hamutuk Dezenvolve Ita-Nia Nasaun ida Prósperu iha Futuru”.
Notísia relevante: Loron Nasionál Juventude: “Orgullu ho ita-nia istória no hamutuk dezenvolve ita-nia nasaun”
Jornalista: Abílio Elo Nini
Editora: Maria Auxiliadora
