OÉ-CUSSE, 06 Novembru 2024 (TATOLI) – Ministériu Saúde rejista ema ho moras mentál 1.872 no sofre saúde mentál epilepsia 1.317, informa Xefe Seksaun Saúde Moras Mentál, Maria Ângela Silva.
“Dadus ne’e husi munisípiu 13, inklui RAEOA hamutuk 1.872, feto 978 no mane 894. Dadus ne’e rejistadu no hetan ona tratamentu, no rejista mós saúde mentál epilepsy 1.317, feto 575 no mane 742”, Maria Ângela Silva dehan iha Oé-Cusse.
Nia salienta katak dadus ne’e rejista, entre 2002 tno 2023, ne’ebé balun halo ona tratamentu hodi muda de’it nia hahalok, maibé seluk sei kontinua sofre moras mentál.
Notísia relevante: MSSI introdús padraun operasionál no prosedimentu saúde mentál iha Oé-Cusse
“Agora, ita iha ona parseiru serbisu hamutuk ho PRADET no MSSI. Karik komunidade ou família ruma sofre moras mentál ka hatudu sintoma entaun refere bá iha sentru saúde ne’ebé besik no ospitál referénsia atu hetan tratamentu. Karik tratamentu fó ai-moruk mak laiha mudansa ruma, entaun bele refere bá sentru Laklubar,” nia dehan.
Nia esplika katak kauza husi moras mentál ne’e to’o daudaun ne’e seidauk iha peskiza detallu, maibé realidade akontese iha Timor-Leste maioria ba psikososiál no atu hatene ema nia moras, to’o agora seidauk iha peskiza.
Notísia relevante: Ministériu Saúde introdús matadalan trata moras mentál iha Pante Makasar
Ministériu Saúde durante ne’e destaka ona profisionál saúde esira iha munisipu hotu atu fó atendimentu ba ema ho moras mentál sira.
Jornalista: Abílio Elo Nini
Editora: Maria Auxiliadora
