OÉ-CUSSE, 06 Novembru 2024 (TATOLI) – Ministériu Solidariedade Sosiál no Inkluzaun (MSSI) hamutuk parsériu sira organiza semináriu hodi sensibiliza padraun operasionál no prosedimentu integradu referál saúde mentál no apoia psikososiál ba entidade sira iha sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Xefe Departamentu Reabilitasaun Servisu Sosiál MSSI, Sílvia Vicente, hateten sensibilizasaun ne’e alvu ba xefe suku, xefe aldeia, Ofisiál Polísia Suku (OPS), inklui parsériu sira atu hasa’e koñesimentu hodi fó atendimentu dignu ba ema ho defisiénsia mentál sira.
Atividade ne’e ho objetivu tolu mak atu gia pesoál saúde, tékniku sosiál, parseiru relevante sira-ne’ebé serbisu ba área saúde mental, inklui membru komunidade hahú husi identifikasaun no re-integrasaun ba iha prosesu tomak hodi apoia psikososiál ba kliente; gia família no komunidade oinsá kolabora hamutuk ho parte relevante hodi responde ba slogan saúde mentál katak ‘Família mak klínika no komunidade mak ospitál’ no ikus, define papél no responsabilidade husi kada instituisaun no organizasaun sosiedade sivíl sira, inklui mós liña koordenasaun ba iha prosesu tomak apoia ba kliente ho defisiénsia mentál.
Notísia relevante: Ministériu Saúde introdús matadalan trata moras mentál iha Pante Makasar
“Tanba ema moras mentál ne’e nu’udar komunidade iha suku no aldeia ida, ne’ebé alvu iha sensibilizasaun ne’e tenke ba xefe suku, xefe aldeia no parte relevante sira, atu sira bele hatene oinsá bele refere no halo tratamentu ba ema sira-ne’ebé moras mentál”, nia esplika iha salaun Edukasaun Oé-Cusse, ohin.
Fatin hanesan, Diretór Rekursu Umanu, Sebastião Iku, konsidera semináriu ne’e importante nune’e ema hotu kontribui tau-matan ba sira-ne’ebé sofre moras mentál atu moris livre iha sosiedade ida-ne’ebé inklusiva, livre husi stigma no diskriminasaun.
Notísia relevante: MS lansa padraun operasionál no prosedimentu integradu referrál saúde mentál
“Workshop ohin bele fahe ona informasaun mai Oé-Cusse, tanba asuntu ne’e sai preokupasaun ba ita hotu, maibé agradese tanba ohin estrutura suku no parseiru sira hamutuk iha ne’e, nune’e atu kontinua partilla informasaun atu hamutuk tulun ita-nia maluk sira-ne’ebé sofre moras mental”, dehan.
Iha ámbitu ne’e, Adjuntu Diretór Servisu Saúde Oé-Cusse, Tomás Vasco, fó-sai kona-ba dadus moras mentál rejistadu iha Oé-Cusse hamutuk 70, kompostu husi moras mental 58 no epilepsy 12.
Notísia relevante: Reflesaun loron mundiál Saúde Mentál: 10 outubru 2023
Hola parte iha atividade ne’e, xefe suku na’in-ualu ne’ebé pertense ba sub-rejiaun Pante Makasar, Ofisiál Polísia Suku (OPS), profisionál saúde, parseiru referál sira hanesan Pradet no seluk tan, inklui Organizasaun Naun-Governamentál (ONG) sira.
Jornalista: Abílio Elo Nini
Editora: Maria Auxiliadora
