iklan

OPINIAUN

Reflesaun loron mundiál Saúde Mentál: 10 outubru 2023

Reflesaun loron mundiál Saúde Mentál:  10 outubru 2023

Nico Ximenes

Tema mundiál “Mental Health is a Universal Human Right”

Tema selebebrasaun loron mundiál saúde mentál ba tinan 2023 ne’e kursial no relevante tebes ba ita idak-idak hanesan umanu ne’ebé iha dignidade “Human dignity”, iha tema ida ne’e atu hatete mai ita katak saúde mentál parte ida hosi direitu fundamentál ema ida nian no ema hotu-hotu iha ne’ebé deit, iha direitu ba saúde mentál alias “Mentál Saudavel”.

Iha oportunidade ida ne’e hakarak husu ba ema idak-idak atu halo pergunta ba idak-idak nia an “Oinsá saúde mentál ne’e importante ba ha’u-nia an?, Saúde mentál ne’e sai direitu fundamentál no universál saida mak ha’u sei halo hodi goja masimu ba ha’u-nia direitu ne’e ? no Oinsá ha’u respeitu no valoriza direitu ida ne’e iha ha’u-nia família, komunidade no nasaun? Pergunta tolu ne’e ha’u hakarak ita hotu halo reflesaun ne’ebé kle’an ba ita-nia an hodi hamosu konsiénsia no sensivel ba asuntu saúde mental ba ita-nia an, ita-nia familia, komunidade no iha ita-nia nasaun!

Difinisaun Saúde Mentál tuir matenek-na’in Pieper no Uden (2006), iha lian Indonesia hatete katak “Kesehatan mental adalah suatu keadaan dimana seseorang tidak mengalami perasaan bersalah terhadap dirinya sendiri, memiliki estimasi yang relistis terhadap dirinya sendiri dan dapat menerimam kekurangan atau kelemahannya, kemampuan menghadapi masalah-masalah dalam hidupnya, memiliki kepuasan dalam kehidupan sosialnya, serta memiliki kebahagiaan dalam hidupnya”.

Husi teoria ne’e hakarak sumariza no énfaze katak saúde mentál ne’e iha relasaun importante tebes iha ita-nia an atu ita iha hanoin ne’ebé klaru no loos, kuidadu ita-nia emosaun atu hasoru dezafiu oi-oin iha ita-nia moris loron-loron no Oinsá ita bele hatudu ita-nia atetude ne’ebé di’ak iha situasaun saida de’it bainhira ita halo interasaun sosiál no husu mai ita atu halo balansu ba komponente tolu (Hanoin, emosaun no hahalok) ez; livre husi stress, transforma hanoin negativu ba pozitivu, kria komunikasaun saudavel, maneja emosaun ho pozitivu, kria interasaun sosiál ho amigavel, sensível no promove asaun tulun malu, labele halo agresaun fíziku hasoru maluk seluk nune’e bele hamosu integridade umanu ne’ebé kualidade hodi moris iha situasaun armonia no prosperu iha ita-nia família, sosiedade no nasaun.

Husi definisaun sira iha leten atu husu mai ita idak-idak nia an atu hakonu no ezerse ita-nia direitu fundamentál ba asuntu saúde mentál nian atu ita bele iha mentál ne’ebé saudavel no livre hosi problema mentál (stress, depresaun, ansiadade nst) ne’ebé fo prejuízu ba ita-nia moris no iha situasaun balun bele lori ita ba hakotu ita-nia vida rasik (suisídiu/oho an). iha sorin seluk husu mós mai ita atu respeitu no valoriza direitu fundamentál ida ne’e atu promove no kria relasaun di’ak no tulun malu liu-liu ba maluk sira ne’ebé ho kondisaun problema mentál atu hetan direitu ba tratamentu, ijiene di’ak, nutrisaun, livre hosi stigama no diskriminasaun, abandona, liberdade movimentu no direitu sira seluk ne’ebé konsagra ona iha ita-nia konsitituisaun RDTL artigo 16 kona-ba Universalidade no igulidade iha alina 2 “labele halo diskriminasaun ba ema ida tanba nia kulit, nia rasa, nia estadu sívil, nia seksu, orijen étniku, nia lian, pozisaun sosiál eh ekonómiku, hanoin polítiku ka ideolojia, relijaun, instrusaun eh nia kondisaun fíziku eh mentál no artigu 21 kona-ba sidadaun ne’ebé iha difisiénsia, iha alina 1 “sidadaun ne’ebé iha defisiénsia fíziku eh mentál iha direitu no mós obrigasaun hanesan ho sidadaun sira seluk, maibé sira sei la hala’o knaar hirak ne’ebé sira labele hala’o tanba de’it sira-nia defisiénsia”. Nune’e mos iha artigu sira seluk ne’ebé relevante ba direitu umanus hanesan konvensaun direitu ba ema ho difisiénsa (United Nation Convention of People With Disability – UNRCPD) ne’ebé Timor-Leste mós adopta no sai ona membru evetivu iha fulan Fevereiru 2023.

Nune’e iha ikusliu hakarak konklui  katak saúde mentál mak direitu umanu universál ida ba ema hotu-hotu no iha ne’ebé deit, mai ita hotu hakonu no goja direitu ida ne’e iha ita-nia moris hodi valoriza no respeitu direitu ida ne’e iha ita-nia sosiadade liuhusi promove kultura moris saudavel no armonia liuhosi hanoin ne’ebé klaru no maduru, jere emosaun ho di’ak no hatudu atetude ne’ebé pozitivu no iha integridade valór umanu nian, liu-liu kuidadu ita-nia an atu labele monu ba situsaun problema mentál no tulun ita-nia maluk sira ho kondisaun problema mental atu hetan tratamentu mentál, ijiene no nutrisaun di’ak no labele diskrimina sira (komunikasaun ne’ebé laamigavel, abandona, agresaun físiku, kesi, sulan no tipu seluktan, maibé ita halo balansu ba ita-nia hanoin, emosaun no hahalok hodi promove interasaun sosiál ida ne’ebé armonia no prosperu iha família, sosiedade no ita-nia nasaun Timor-Leste.

“Our minds, Our rights”

“No health without mental health”

PARABÉNS BA EMA HOTU-HOTU ESPESIALMENTE POVU DOBEN TIMOR-LESTE

iklan
iklan

Leave a Reply

iklan
error: Content is protected !!