DILI, 07 novembru (TATOLI)—Deputada bankada CNRT, Angela Maria Gorubelo, hato’o apresiasaun no esforsu tomak ba serbisu Governu Konstitusionál da-sia (IX) ne’ebé kompleta ona mandatu tinan ida (1) fulan haat (4) no husu atu mellora di’ak liután serbisu sira iha 2025 hodi serbi povu no nasaun ne’e.
Notísia Relevante: Komisaun G rekomenda ME tau atensaun ba menus manorin-infraestrura eskola
“Ha’u evita hatán ba reajen husi maluk deputadu sira seluk, maibé ba asuntu balun ha’u sei hatán katak povu ne’e matenek sira la presiza retorika, sira presiza asaun, sira haree no sente daudaun saida mak Governu ne’e halo ona, mezmu foin ukun foin tinan-ida fulan-haat. Se povu ne’e sei hakmatek, kalma ne’e katak povu kontinua fó konfiansa ho konviksaun katak Governasaun ne’ebé lideradu husi Kay Rala Xanana Gusmão. Bainhira nia ukun ne’e ramata iha tinan haat mai, sei lori duni dezenvolvimentu ba rai doben ida-ne’e,” Nia hato’o iha intervensaun ba debate proposta Orsamentu Jerál Estadu (OJE) 2025 iha faze jeneralidade ba loron daruak iha sala plenária PN, kinta ne’e.
Nia fó apresiasaun boot no esforsu tomak husi Governu Konstitusionál da-sia (IX), sira hotu-hotu nia dezempeñu serbisu barak di’ak.
Balun presiza hadi’a nia jestaun serbisu, nune’e nia hakarak foti asaun ba Ministériu Agrikultura, Peska, Pekuária no Floresta (MAPPF) ne’ebé hahú reativa atividade agrikultura nian liuliu iha área sira ne’ebé iha natar.
Ne’ebé, durante tinan hirak nia laran ne’e la haree atividade iha natar maibé dezde nonu Governu ne’e iha tinan kotuk to’o tinan ida-ne’e, produsaun hare iha munisípiu no balun la’o daudaun ho rítmu signifikante.
Tanba ne’e, investimentu iha setór agrikultura ne’e sai prioridade duni, daudaun ne’e ministériu agrikultura tau matan hela ba projetu irrigasaun-rua, ida iha Laivai, munisípiu Lautém, ida seluk iha Galata, munisípiu Baucau,
Projetu irrigasaun Maliana tama ona ba ba faze mobilizasaun ba konstrusaun no irrigasaun Uatu-Ua (Gariuai-Baucau) no irrigasaun Irrabere (Uatucarbau-Viqueque) tama ba faze finál aprovizionamentu ninian.
Iha parte seluk, apresia mós serbisu Ministra Edukasaun ninia desizaun ne’ebé firme tebes hodi kontinua implementa dekretu-lei ne’ebé iha Governu Konstitusionál da-ualu (VIII) kria, nune’e konsege rezolve problema ne’ebé tinan barak manorin sira hasoru, nune’e iha manorin 4000-resin tama ingresu espesiál.
Deputadu CNRT, Marcos Xavier, dehan dezenvolvimentu infraestrutura Governu da-sia halo mudansa, ezemplu ida hanesan ponte Kasnafar iha Governu Konstitusionál da-ualu halo tenderizasaun ho orsamentu millaun $9-resin maibé Governu da-sia haree fali dezeñu no BoQ sira ita redús tiha osan millaun $3-resin,
Nune’e mós, estrada Maliana iha Governu anteriór loke tenderizasaun millaun $21 halo de’it estrada kilómetru lima maibé iha Governu agora haree fali redús halo kilómetru 18, hanoin ne’e faktu ne’ebé mak iha.
Iha konstrusaun infraestrutura ba fasilidade saúde no mós iha área edukasaun ba eskola sira, nune’e liuhusi diskusaun proposta OJE 2025 hakarak rekomenda ba Governu atu halo di’ak liután serbisu iha tinan 2025.
Deputada CNRT, Ricardo Baptista, fó apresiasaun ba Governu ba serbisu ba susesu balun hala’o ne’ebé hala’o hanesan iha estrada urbana iha Dili laran no estrada iha munisípiu, organiza sidade Dili organizadu, simu vizita Amu Papa Francisco ho Sekretáriu Jerál ONU, inklui susesu sira iha área petróliu.
Iha setór agrikultura aselera prosesu halo kontrusaun irrigasaun iha Galata-Baucau, no irrigasaun Maliana I no II komesa atu lansamentu kontratu ne’ebé agora iha irrigasaun lima mak atu halo.
Nune’e, hanoin iha tinan oin, MAPFF tau mós orsamentu iha fundu infraestrutura iha irrigasaun, nune’e nu’udar reprezentante povu hakarak ezije ba Governu atu bele aselera irrigasaun nune’e bee bele to’o natar no toos-na’in hodi aumenta produsaun rai-laran.
“Ita mós apresia Governu ida-ne’e iha Manatuto serbisu hamutuk ho Governu Xina nian, halo kolleta dala-tolu iha tinan ida. Hanoin ida-ne’e, ita presiza apresia tanba iha fiskalizasaun, ita Deputadu sira-nia haree agrikultór sira susar hetan asesu bee. Ita hein ho irrigasaun ne’ebé halo bele fornese bee. Problema segundu mak tratór, maibé ho orsamentu ne’ebé iha MAPPF hein tinan oin ita la’o ho di’ak,” nia dehan.
Deputada FRETILIN, Maria Angelica Rangel, preokupa durante ne’e sempre hasoru problema iha fasilidade saúde menus ai-moruk nune’e bolu atensaun Governu liuhusi Ministériu Saúde atu atensaun, inklui mellora liután atendimentu saúde ba povu.
Deputada FRETILIN, Mariquita Soares, preokupa ho desizaun Ministra Edukasaun hapara kontratu manorin 1000-resin ne’ebé afeta menus manorin iha eskola sira atu hanorin estudante sira.
Notísia Relevante: Komisaun F rekomenda MS hadi’a serbisu saúde iha TL
Jornalista : Nelson de Sousa
Editór : Cancio Ximenes
