DILI, 07 novembru 2025 (TATOLI)—Deputada husi bankada CNRT, Lúcia Taeki, konsidera proposta-lei Orsamentu Jerál Estadu (OJE) 2025 ho montante biliaun $2,6 reflete povu nia nesesidade.
Notísia Relevante: PN konsidera Governu kumpre LEO submete proposta-lei OJE 2025
“Relativamente proposta OJE 2025 deskreve no aprezenta definisaun no esplikasaun estratéjiku no ekilibrada ba povu nia moris. Nune’e, hamout no halakon desigualdade, irregularidade, diskriminasaun no emosaun husi intensidade no tensaun povu nian,” Nia hato’o iha intervensaun iha debate proposta OJE 2025 iha faze jeneralidade ba loron daruak iha sala plenária PN, kinta ne’e.
Tanba ne’e, nia hakarak louva no apresia ba Governu Konstitusionál da-sia ne’ebé mak iha proposta OJE 2025 foka no fó prioridade ba investimentu iha setór produtivu sira hanesan infraestrutura, saúde, edukasaun, protesaun sosiál no ambientál, no liuhusi setór hirak ne’e mak hatuur esperansa ba konstrusaun Estadu no sosiedade ne’ebé prósperu no justa iha próximu.
Apresia Governu ho seriedade no intensidade hodi mellora sistema serbisu no atendimentu saúde iha territóriu Timor-Leste iha períodu 2025, partikularmente apresia ho polítika Governu da-sia ne’ebé aloka millaun $8,1 ba prestasaun tratamentu saúde iha rai-li’ur no millaun $2 ba subsídiu kondisionál ba saúde no nutrisaun ba feto isin-rua no labarik sira, alokasaun refere define hodi halo kombate mánutrisuan iha Timor-Leste.
Nune’e, nia dehan, bele prepara ona rekursu umanu ba futuru ida-ne’ebé prósperu no ijéne, tanba atualidade kazu mánutrisaun sai preokupasaun.
Nia dehan, Governu mós propoin millaun $92,2 hodi hadi’a servisu saúde iha teritóriu nasionál no área rurál, tan ne’e sente orgullu ho protidaun Governu da-sia ne’ebé investe iha setór saúde hodi harii nasaun ida-ne’ebé forte no prepara futuru jerasionál ne’ebé saudável no konfortável ba Timor nia di’ak.
Tema períodu fiskál 2025 mak “Investimentu iha infraestrutura estratéjika, reforsu iha ekonomia no mellora bein estar sidadaun sira-nian”, no liuhusi deskrisaun hirak ne’e mostra Governu nia seriedade no atensaun ba ninia povu.
“Tan ne’e, proposta orsamentu ida-ne’e reflete aktu korrespondénsia ba nesesidade povu nian, no garante dezenvolvimento sustentável ba povu nia moris iha prósperu, armonia no alegria. Ida-ne’e mak hatudu sentidu orsamentál husi povu no ba povu hodi benefísia dezenvolvimentu integradu ba povu no liuhusi povu,” nia hateten.
Hanesan iha diskursu Primeiru-Ministru, Kay Rala Xanana Gusmão, hateten iha tinan 2024 ne’e sai hanesan tinan atu kurije tiha frajilidade no irregularidade no 2025 sai hanesan tinan implementasaun.
Deputadu CNRT, Marcos Xavier, hateten iha lema proposta OJE 2025 katak ‘investimentu iha infraestrutura estratéjika, reforsu iha ekonomia no mellora bein estar sidadaun sira-nian’ ne’e importante tebes, tanba estrada di’ak mak povu bele lori produtu ba merkadu no irrigasaun di’ak mak povu bele aumenta produsaun, aleinde infraestrutura eskola no saúde di’ak mak bele fó atendimentu di’ak ba povu.
Deputada FRETILIN, Maria Angelica Rangel, husu atu fó prioridade hadi’a bein estar sidadaun ba protesaun sosiál, edukasaun no formasaun, saúde no medikamentu, bee-moos, dezenvolvimentu rurál no urbana.
Deputada FRETILIN, Veronica Fernandes, hateten proposta OJE 2025 ne’ebé aprezenta husi Governu Konstitusionál da-sia loloos tenke sai orsamentu ida-ne’ebé reflete nesesidade no aspirasaun povu nian, liuliu foinsa’e sira-ne’ebé ohin loron konstitui purvolta 70% husi populasaun Timor-Leste nian, foinsa’e ida-ne’e reprezenta prezente no futuru no ai-riin boot ida ba Timor-Leste.
“Maibé, buat ne’ebé ita haree iha proposta orsamentu ne’e mak Governu laiha kompromisu ba realidade juventude nian no laiha interrese atu investe iha ita-nia nasaun nia futuru. Taxa dezempregu juventude nian iha Timor-Leste sai alarmante, no juventude hasoru senáriu triste ida. Maioria joven timoroan ne’ebé kompleta sira-nia estudu, tantu iha nivel sekundáriu ka universidade, hasoru merkadu traballu ne’ebé ladún ka laiha liu oportunidade uitoan de’it ba sira,” nia dehan.
Tanba ne’e, nia husu atu proposta orsamentu ne’e loloos tenke fó prioridade ba kriasaun empregu no inisiativa sira atu absorve forsa traballu hosi joven sira.
Primeiru-Ministru (PM), Kay Rala Xanana Gusmão, hateten kona-ba formasaun ba joven hanoin kontinua tau prioridade iha Fundu Dezenvolvimentu Kapitál Umanu (FDCH, sigla portugés) hodi kapasita joven sira.
Notísia Relevante: Proposta-lei OJE 2025 kumpre rekezitu formál
Jornalista : Nelson de Sousa
Editór : Cancio Ximenes
