DILI, 11 novembru 2024 (TATOLI)—Deputada opozisaun PLP, Maria Angelina Sarmento, rekomenda ba Governu atu aprezenta lei tributária hodi aumenta kolesaun reseita doméstika.
Notísia Relevante: MF tau prioridade aumenta kollesaun reseita naun petrolífera iha 2025
“Tinan-tinan reseita doméstika ladún fó projesaun di’ak, reseita doméstika laiha aumentu. Buat ida, Governu dezde inisía promete mak atu hadi’a lei tributária. Artigu rua ne’e atu bele estimula reseita doméstika no nia impaktu ba oin nafatin konsidera lei estimula reseita doméstika,” Nia hato’o iha debate proposta Orsamentu Jerál Estadu (OJE) 2025 iha faze espesialidade ba loron dahuluk, iha sala plenária PN, segunda ne’e.
Notísia Relevante: PN aprova proposta OJE 2025 iha faze jeneralidade ho votu afavór 42
Tanba ne’e, nia dehan, lei ne’e la adekuadu Governu iha planu atu lori mai PN atu altera hodi bele aumenta kresimentu reseita.
Deputada opozisaun husu ne’e iha debate proposta-lei OJE 2025 to’o iha artigu 2 (Aprovasaun tabela orsamentál), alinea “d” Tabela IV-Reseita sub-setór administrasaun sentrál, por klasifikasaun ekonómika.
Deputada FRETILIN, Maria Angelica Rangel, dehan haree ba impostu taxa, penalidade ne’e finansia mós orsamentu Estadu, nune’e iha audiénsia públika proposta OJE 2025 nia-parte hato’o ona liuliu ba Ministériu Transporte no Komunikasaun (MTK), relasiona ho serbisu Autoridade Nasionál Komunikasaun (ANC, siglá portugés) ninia kontrola ba operadór telekomunikasaun sira ne’ebé kontra infrasaun nune’e atu sai mós kontrolu di’ak liután reseita sira-ne’e tama duni ba kofre Estadu.
Deputada FRETILIN, Lídia Norberta, mós foti kona-ba koima ka penalidade husi parte PNTL liuhusi serbisu tránzitu no serbisu imigrasaun iha Ministériu Interiór, tanba husi fiskalizasaun haree sira tau duni esforsu repoin orden hodi fó duni reseita, maibé nia preokupa sira iha konta ida de’it ka oinsá, tanba iha aprezentasaun iha dokumentu livru OJE la aprezenta.
Deputadu FRETILIN, Antoninho Bianco, mós rekomenda MTK no Ministériu Finansa atu haree kamioneta tula sasán barak tama husi fronteira atu aplika taxa inklui nia mós husu atu MF halo investimentu ba osan fundu seguransa sosiál ne’ebé rai hela.
Deputada CNRT, Cedelízia Farria dos Santos, fó hanoin deputadu sira iha livru porposta OJE 2025 ministériu no entidade públika sira ba reseita, juru, penalidade detallu ona iha ne’eba.
Nia mós hato’o relasiona ho fiskalizasaun komisaun C trata asuntu Finansa Públika nia ba munisípiu sira, hatudu sira reseita munisípiu kiik tebes, la’ós sira la halo maibé se sira husu reseita no taxa penalidade sira bele halo agregasaun osan hanesan ne’e sira kolleta husi nasionál.
Hatán ba ne’e, Ministra Finansa, Santina Cardoso, hateten kona-ba taxa, impostu, penalidade ba ANC nian bele hare livru reseita iha prosposta OJE 2025 sira-nia projesaun millaun $2-resin.
Nia mós reponde, kona-ba konta bankária diresaun tezoru mak loke entidade sira-ne’ebé koleta taxa no impostu no konta sira-ne’e iha kontrola diresaun tezoru nia okos, maibé ami deteta ba osan parseiru no husi tezoru sempre halo aproximasaun nune’e tutela iha tezoru nian.
Kona-ba konta bankária, imigrasaun no tránzitu dalaruma sira-nia kolesaun reseita kiik-liu, nune’e sira iha dokumentu livru proposta OJE 2025, sira tau outros de’it maibé iha detallu kada ida-idak iha.
Governante ne’e hateten, kona-ba reforma fiskál atu aumenta kolesaun reseita doméstika mak MF hadia dadaun pagamentu nune’e kompaña sira bele selu direita iha P24 evita kontaktu ho ofisiál sira.
Nia mós responde, kona-ba seguransa sosiál nian hanesan ita hotu hatene komesa 2011-2024 to’o agora tuir akumulasaun iha ona millaun $305, kona-ba presiza hanoin investe atu osan ne’e labele rai de’it, nune’e hanoin ne’ebé iha MF, Banku Sentrál Timor-Leste (BCTL, siglá portugés) ho Institutu Nasionál Seguransa Sosiál (INSS) hanoin hela iha prosesu atu halo investimentu ba osan ne’ebé iha seguransa sosiál maibé ho kuidadu tebes.
Nia dehan, hanoin mak bele halo alterasaun ba lei dívida públika, nune’e tezouru bele sosa hanesan bons ne’ebé iha orsamentu ne’ebé iha bele hanoin dezenvolvimentu, entaun prosesu ne’e la’o hela.
Kona-ba tarefa transporte ne’ebé tama husi fronteira, MTK ho MF dezenvolve hela inisiativa nune’e kamioneta bele selu taxa no haree ba investimentu ne’ebé Governu halo proteje Timor-Leste nia portu Tibar ne’ebe iha.
Nia hateten, liga ba projesaun Timor-Leste nia reseita kada tinan hanoin aumenta la’ós la sa’e, nune’e Governu ne’e kompromte iha nia prioridade atu aumenta liután kollesaun reseita doméstika.
“Liuliu projesaun ita-nia reseia la’ós la sa’e, tinan-tinan aumenta, hanoin saida mak ami halo hela, saida mak sei hadi’a administrasaun tributária. Tuir fali, hadi’a lei IVA hanesan ASEAN no OMK ne’ebé kriteira ida, ami haree ho kuidadu no sistema administrasaun atu haree ho di’a’k no ema halo auditória,” nia hateten.
Tinan ne’e, hanoin atu halo rekrutamentu ba funsionáriu no formasaun lao hela ba funsionáriu iha tributária no halo desimisaun IVA iha munisípiu sira, hodi introdú informasaun saida mak akontese tempu tuir mai.
Aleinde ne’e, iha mós ezbosu leijislasaun atu aprezenta lei tributária iha ona maibé sei haree impaktu inklui haree mós lei tributária rasik, liga ba iha lei OJE 2023 ne’e hasa’e reseita no 2024 ita hatun, nune’e sei haree tempu apropriadu se lae impaktu ba setór privadu no inflasaun kustu sasán iha merkadu, nune’e sei haree iha tempu oportunu ba lejislasaun sira ho kuidadu.
Entretantu, iha diskusaun espesialidade ohin, PN aprova proposta-lei OJE 2025 iha artigu 2 (Aprovasaun tabela orsamentál) aleina d Tabela IV-Reseita sub-setór administrasaun sentrál, por klasifikasaun ekonómika ho votu afavór 42, kontra 0 no abstensaun 22.
Iha proposta-lei númeru 12/VI(2a) Orsamentu Jerál Estadu (OJE) 2025 hahú husi nia Espozisaun Motivu, no nia iha artigu hamutuk sia (9), ne’ebé hahú husi Kapítulu I Dispozisaun Inisiál, artigu 1 Objetu no ámbitu, Kapítulu II Orsamentu Jerál Estadu, artigu 2 Aprovasaun tabela orsamentál, artigu 3 Impostu, taxa no kontribuisaun, artigu 4 Transferénsia Fundu Petrolífeiru, artigu 5 Dívida Públika, artigu 6 Garantia, artigu 7 Transferénsia entre sub-setór.
Kapítulu III Orsamentu Seguransa Sosiál, artigu 8 Transferénsia saldu Seguransa Sosiál, Kapítulu IV Dispozisaun Finál, artigu 9 Entrada em vigór no produsaun efeitu.
Tuir guiaun ne’ebé iha diskusaun no votasaun iha espesialidade hahú iha kada artigu, númeru ou aleina, no iha tabela orsamentál ho nia anexu iha proposta-lei OJE 2025 no bainhira iha proposta alterasaun mak sei halo uluk diskusaun no votasaun.
Notísia Relevante: Governu sei foti hosi fundu petrolífeiru billaun $1,566 aloka ba OJE 2025
Enkuantu, iha diskusaun espesialidade ba loron dahuluk ne’e, PN aprova ona artigu 1 Objetu no Ambitu.
Artigu 2 Aprovasaun tabela orsamentál, iha aleina a, Tabela I-reseita setór públiku administrativu, por sub-setór, aleina d, tabela IV-reseita sub-setór administrasauns sentrál, por klasifikasaun ekonomika, aleina g, Tabela VII-reseita sub-setór seguransa sosiál, por klafiskasaun ekonomia, totál por rejime no administrasaun, aleina j, Tabella X-reseita sub-setór Rejiaun Administrativa Espesiál Oé-Cusse Ambeno, por klasifikasaun ekonomika.
Notísia Relevante: RAEOA prevee millaun $62 iha OJE 2025
Jornalista : Nelson de Sousa
Editór : Cancio Ximenes
