DILI, 11 novembru 2024 (TATOLI)—Prezidente Parlamentu Nasionál (PPN), Maria Fernanda Lay, husu Deputadu sira-ne’ebé lakohi karreta atu halo deklarasaun.
Notísia Relevante: PN prevee millaun $4-resin atu sosa karreta ba Deputadu sira
“Primeiru hola karreta husi proposta Prezidente, tanba iha deputadu balun la’ós prioridade. Ita halo polítika. Se la hola, ita-boot sira mós labele ezije karreta laiha kondisaun. Daruak, sira bele halo deklarasaun ba sira-ne’ebé lakohi hola. Husu sira halo fiskalizasaun atividade PN iha duni maksimizasaun,” Prezidente Parlamentu Nasionál hateten iha debate proposta Orsamentu Jerál Estadu (OJE) 2025 ba faze espesialidade ba loron dahuluk iha sala plenária PN, segunda ne’e.
Nia dehan, liga karreta Prezidente PN anteriór, antes ne’e husu PN halo jinástika ba karreta, no la justu se kargu xefia laiha kareta no uluk (membru PN balun) estraga tiha karreta hodi uza fali karreta seluk.
Kona-ba poupansa, atu redús osan ka hasai iha PN ba fali Governu nian, maibé orsamentu Governu halo ona ne’e ba tau tan oinsá.
PPN fo sai kona-ba viajen estranjeiru no nia-parte simu konvite 20-resin iha tinan ne’e, maibé nia-parte rekuza tanba lori delegasaun, ne’ebé laiha impaktu diretamente. Por menór atu bele konsidera estudu komparativu deputadu sira iha reprezentasaun iha komisaun, ne’ebé deputadu sira iha ne’eba lori mai.
“Ne’ebé fó proponente pronúnsia (proposta),” nia dehan.
Enkuantu, iha debate espesialidade proposta OJE 2025 ba Parlamentu Nasionál iha faze espesialidade ne’e Deputadu husi bankada opozisaun liuliu FRETILIN aprezenta proposta hamutuk hitu hodi husu halo redusaun orsamentu PN iha tinan oin husi montante inisiál $23,509,772.
Liuliu husu atu redusaun osan ba viajen estranjeiru ho montante $590,872, redusaun $4.225.000 ne’ebé tau atu sosa karreta ba Deputadu na’in-65, redusaun $264.000 aloka ba saláriu vensimentu asesór internasionál no nasionál, redusaun $407.871 ne’ebé tau iha gabinete PN iha rubrika bens no serbisu ba atividade promosaun reforsu lasu diplomátiku parlamentár, redusaun $715,678 ba viajen estudu komparativu.
Redusaun rihun $500 husi programa fomentar relasaun internasionál no kooperasaun Parlamentu ne’ebé sei aprezenta proposta tuir mai hodi aloka fali ba iha área saúde, tanba tinan barak ona ita haruka pasiente ba rai-liur liuliu ba inan isin-rua no mós maluk saúde mentál.
Ho justifikasaun katak, diplomásia parlamentár importante maibé presiza define ita-nia prioridade.
Deputadu FRETILIN, Joaquim dos Santos, dehan vizita ba estranjeiru halo despeza de’it no estudu komparativu rezultadu laiha, nune’e di’ak-liu tinan oin ita konsentra prodús lejislasaun sira.
Deputadu FRETILIN, Antoninho Bianco, fundamenta PN labele kada lejislatura sosa karreta, tanba ne’e iha proposta ne’e husu hasai osan, no proposta sira-ne’e tanba haree ba preokupasaun ho fundu mina-rai besik hotu nune’e presiza halo poupansa.
Membru konsellu administrasaun no Deputadu CNRT, Gabriel Soares, dehan orsamentu privativu PN ita aprova ona, agora uza antena saida mak atu hateten ba povu sai anju metan.
Membru konsellu administrasaun no Deputada PD, Terresa Gusmão, ko’alia kona-ba poupansa PN iha espirítu, tanba hanesan iha lejislatura daneen bainbain iha merenda no alomosu maibé agora laiha ona.
Deputada KHUNTO, Irena Gongaza, hanoin orsamentu privativu aprova ona ho afavór 42, no kona-ba sosa karreta hanoin parte bankada nia hanoin ne’e la’ós ba Deputadu na’in-lima ne’ebé reprezenta bankada nian iha ne’e maibé atu hala’o serbisu.
Entertantu, hafoin ne’e avansa ba votasaun ba proposta sira-ne’e la pasa iha plenária.
OJE 2025 ba PN $23,509,772 aprovadu iha espesialidade
Parlamentu Nasionál (PN) ninia proposta Orsamentu Jerál Estadu (OJE) ba tinan fiskál 2025 ho montante $23,509,772 aprova iha faze espesialidade ho votu afavór 42, kontra no abstensaun zero.
“Nune’e, ita hakat ba votasaun PN, rezultadu votasaun afavór 42, kontra 0, abstensaun 0, ne’ebé votasaun konfirmadu, hanesan uluk,” Prezidente Parlamentu Nasionál, Maria Feranda Lay, fó sai iha sala plenária ba diskusaun no votasaun ba proposta OJE 2025 iha faze espesialidade ba loron dahuluk iha sala plenária PN, segunda ne’e.
Momtante orsamentu $23,509,772 ne’e hodi aloka ba saláriu vensimentu $11,934,844, bens no serbisu $6,160,019, transferénsia públika $985,697, kapitál menór $4,429,212.
Husi orsamentu ne’e finansia programa lima (5) mak hanesan programa fomentar relasaun internasionál no kooperasaun Parlamentu ho sub-programa relasaun internasionál ho atividade ida (1), sub-programa kooperasaun internasionál ho atividade ida (1).
Programa garante ezersísiu funsaun konstitusionál Parlamentu ho sub-programa fortalesimentu reprezentasaun demokrátika ho atividade ida (1), sub-programa fortalesimentu inisitiava no fiskalizasaun lejislativa iha atividade lima (5), sub-programa fortalesimentu fiskalizasaun orsamentál no polítika ho atividade ida (1).
Programa kultura abertura no transferénsia iha Parlamentu ho sub-programa ita-nia Parlamentu ho atividade haat (4).
Programa funsionamentu no dezenvolvimentu instituisionál ho sub-programa rua (2) no atividade ualu (8).
Notísia Relevante: FRETILIN husu koa osan Prezidénsia Repúblika halo poupansa maibé la pasa
Jornalista : Nelson de Sousa
Editór : Cancio Ximenes
