COVALIMA, 11 Novembru 2024 (TATOLI) – Sentru Juventude Covalima (CJC) organiza sermináriu hodi konvida sobrevivente 12 Novembru hodi partilla istória Masakre Santa Krús ba alunu ensinu sekundáriu sira, iha Covalima.
“Ita organiza semináriu hodi konvida sobrevivente ho objetivu ida mak atu relembra hikas istória pasada, ne’ebé ita-nia juventude loriku asu’ain luta ba independénsia, nune’e ohin loron ita hotu bele goza”, Diretór-Ezekutivu CJC, Júlio Ferreira, hato’o iha salaun CJC, Kampung Baru, ohin.
Iha semináriu ne’e, CJC konvida oradór sira hanesan sobrevivente 12 Novembru, Júlio Moniz ‘Bobo’ hodi ko’alia istória akontesimentu 12 Novembru 1991, Koordenadór Dewan Solidaritas Pemuda Pelajar Timor-Timur (DSPPTT), Ergildo Ferreira Vicente, partilla istória kona-ba partisipasaun juventude iha luta ba libertasaun Timor-Leste.
Sobrevivente Júlio Moniz Bobo konta katak istória 12 Novembru, istória masakrada, tanba timoroan barak lakon vida to’o ohin loron balun la hetan sira-nia ruin, tanba de’it buka ukun rasik-aan.
“Temi Masakre Santa Krús 1991, loron ida-ne’e hodi forma juventude jerasaun loriku asu’ain. Ohin loron ita komemora nafatin loron ne’e”, nia dehan.
Tanba ne’e, joven-sira presiza atu komprendedidi’ak istória Masakre Santa Krús, 12 Novembru 1991, nune’e sobrevivente-sira daudaun ne’e tau ona hanoin hamutuk hodi hahú hakerek ona istória hodi prepara atu distribui ba eskola sira.
Nia fó hanoin ba joven-sira bainhira uza farda labele hein malu iha eskola atu baku-malu no tuda malu, tanba agora la’ós ona tempu, maibé tempu atu estuda hodi halo dezenvolvimentu.
“Baku-malu no tuda malu hotu ona iha ami-nia tempu, tanba de’it atu buka ukun rasik-aan, maibé joven agora labele kontinua ona ho asaun hirak ne’e, tanba laiha vantajen atu fó moris ba ita-boot sira iha futuru”, nia informa.
Prezidente Autoridade Munisípiu Covalima, Miguel Armada Cardoso, dehan istória 12 Novembru la fásil, tanba timoroan barak sai vítima. “Iha momentu ne’e, ha’u mós terus ,ohin loron 11 Novembru, ha’u lembra fila husi Dili atu mai Suai, sorte ho kolega balun bele ajuda, se la’e ha’u mate ho ha’u-nia kolega husi Viqueque ”, nia relata.
Auotoridade ne’e mós agradese ba Ministériu Juventude Desportu, Arte no Kultura (MJDAK) tanba kada tinan prevee orsamentu atu komemora loron nasionál iha 12 Novembru hodi hanoin hikas istória pasada, tanba ne’e estudante sira presiza atu rona.
Pontu fokál MJDAK Covalima, Lúcia Gomes, husu ba alunu-sira atu rona istória, nune’e bele hatene kle’an istória ne’ebé sobrevivente sira konta tuir sira-nia sofrimentu iha altura ne’ebá.
“Ita presiza atu rona istória, nune’e ita ne’ebé sei moris kontinua konta nafatin, nune’e sai hanesan mós matadalan ba foinsa’e sira atu labele envolve iha asaun krime ne’ebé la fó vantazen ba ita-boot sira”, nia husu.
Selebrasaun Loron Nasionál Juventude no komemorasaun Masakre Santa Krús 1991 ba da-33 iha tinan ne’e ho tema “Orgullu ho ita-nia istória no hamutuk dezenvolve ita-nia nasaun ida prósperu iha futuru”.
Notísia relevante: MJDAK disponibiliza $4.700 ba CJC hodi komemora 12 Novembru
Jornalista: Celestina Teles
Editora: Maria Auxiliadora
