OÉ-CUSSE, 11 Novembru 2024 (TATOLI) –Institutu Nasionál Administrasaun Públika (INAP) halo abertura, iha segunda ne’e, formasaun ba xefe suku 18 iha Rejiaun Administrativa Espesiál Oé-Cusse Ambeno (RAEOA) hodi hasa’e sira-nia koñesimentu iha área téknika ba jestaun lideransa, administrasaun no kontrolu nian.
Formasaun ne’e loke husi Sekretáriu Estadu Dezenvolvimentu Lokál, Mateus dos Santos Tallo, hodi husu ba xefe suku sira atu partisipa másima iha atividade ne’e durante semana ida, nune’e bele hasa’e koñesimentu, liuliu knaar líder komunitáriu.
“Formasaun ne’e hanesan inísiu husi INAP, formasaun téknika ba líder komunitáriu sira. Ita hotu hatene depois sira eleitu tinan kotuk, iha Oé-Cusse na’in-11 mak reeleitu no na’in-7 mak eleitu foun, entaun, INAP hala’o nia funsaun oinsá atu kapasita líder komunitáriu. Ita hatene povu hili sira hanesan líder iha komunidade oinsá sira bele iha kapasidade ein termu administrativa atu jere sira-nia suku”, governante ne’e dehan iha salaun administrasaun Numbei.
Notiísia relevante: Autoridade RAEOA selebra akordu ho xefe suku 18 implementa ‘Programa Suku Amasat’
Nia husu ba autoridade lokál sira atu partisipa másima, nune’e hetan matéria foun ruma husi formadór sira, la haree de’it ba teoria maibé prátika sira serbisu loron-loron nian oinsá utiliza teoria atu kontestualiza iha sira-nia suku depois sira bele lidera ho di’ak.
Iha fatin hanesan, Diretór-Jerál Interinu INAP, Belarmino Amaral, hateten INAP mak iha kompeténsia atu fó formasaun ba funsionáriu no xefe suku sira atu hasa’e koñesimentu liga ho knaar no kompeténsia ne’ebé iha.
“Iha matéria hitu mak INAP sei fornese, primeiru, ida-ne’ebé esensiál katak atu fó ba formandu xefe suku sira sobre foti desizaun. Bainhira povu eleitu nia, nia tenke hatene oinsá foti desizaun no rezolve problema ruma iha komunidade nia leet, depois matéria seluk mak sei kompleta ho matéria foti desizaun ne’e”, esplika.
Nia salienta katak matéria seluk mak formasaun téknika lideransa nu’udar papél líder ida iha suku no oinsá jere administrasaun suku no kontrolu ba obra ne’ebé Governu harii ona iha suku, liuliu ba setór edukasaun, saúde no seluk tan.
Sekretáriu Rejionál ba Asuntu Administrasaun RAEOA, André Lao, realsa katak formasaun ne’e importante atu hasa’e koñesimentu xefe suku nian hodi lidera suku no komunidade ho di’ak liután.
“Autoridade agradese tanba primeira vez kapasita ita-nia xefe suku sira iha Oé-Cusse. Ita hatene sira mak líder ki’ikliu ne’ebé besik liu komunidade iha baze, entaun durante formasaun xefe suku sira husu saida de’it ba formadór sira atu esplika ba ita-boot sira tanba formasaun ne’e liga direta ba sira-nia knaar iha suku”, nia sejere.
Notiísia relevante: Xefe suku 18 hosi RAEOA hala’o estudu komparativu iha TTU-TTS
Fomasaun ne’e envolve formadór na’in-tolu no fasilitadór na’in-rua ne’ebé realiza durante loron lima.
Jornalista: Abílio Elo Nini
Editora: Maria Auxilidora
