12 Novembru fanu joven sira atu afirma nasionalizmu no patriotizmu
OÉ-CUSSE, 12 Novembru 2024 (TATOLI) – Komité 12 Novembru hamutuk ho Autoridade Rejiaun Administrativa Espesiál Oé-Cusse Ambeno (RAEOA) realiza semináriu hodi komemora Loron Nasionál Juventude no Masakre Santa Krús 12 Novembru 1991, ne’ebé realiza iha Sentru Juventude Rejiaun Oé-Cusse (CJRO, sigla portugés).
Selebrasaun Loron Nasionál Juventude tinan ne’e ho tema “Orgullu ho Ita-Nia Istória no Hamutuk Dezenvolve Ita-nia Nasaun ida Prósperu iha Futuru. Iha Oé-Cusse, estudante, veteranu, relijiozu no entidade relevante sira seluk halo kalan reflesaun no diálogu abertu hodi afirma sira-nia nasionalizmu no patriotizmu.
“Eventu ne’e tinan-tinan ita selebra atu fó hanoin nafatin, liuliu ba foinsa’e sira atu hamriik fó espíritu nasionalizmu no patriotizmu ba nasaun, liuliu iha RAEOA, tanba alin balun moris iha 2000 mai leten rona istória, maibé akontesimentu iha tempu pasadu ne’e la haree ho matan”, Prezidente Komité 12 Novembru Oé-Cusse, Domingos de Almeida, dehan iha abertura seminariu ne’e.
Notísia relevante: 12 Novembru 1991: Tane aas valór juventude rezisténsia no partisipasaun igreja iha dezenvolvimentu Estadu RDTL
Tanba ne;e, hamutuk halo reflesaun liuhusi semináriu ne’e hodi fó hanoin ba malu oinsá atu lori Oé-Cusse no Timor-Leste ba oin liga ho tema ne’e. “Tanba kada tinan, ami mate restu husi 12 Novembru tuba rai-metin hamrik iha alin sira-nia kotuk, maske iha difikuldade oioin tenke la’o ba oin, tanba Timor-Leste presiza ida de’it mak rekursu umanu, nune’e kontinua eskola, labele baruk, tanba ida-ne’e ita kontribui ona ba Estadu”, nia sujere.
Notísia relevante: Dom Virgílio : Foinsa’e tenke kuda espiritu patriotizmu iha fuan no hahalok
Iha fatin hanesan, Sekretáriu Rejionál ba Asuntu Administrasaun, André Lao, ne’ebé reprezenta Prezidente Autoridade RAEOA dehan 12 Novembru komplenta ona tinan 33, tanba presiza fó hanoin ba jerasaun sira kona-ba istória ne’e, katak ukun rasik-aan ne’e prosesu naruk ida mak 1991 joven mate barak iha loron ne’e.
“Ita nafatin sunu lilin no reza ba sira atu fó ita matak-malirin ba ita-nia rai doben Timor-Leste”, nia hateten.
André Lao salienta katak selebrasaun 12 Novembru iha Oé-Cusse, tinan ne’e, laiha atividade oioin, maibé importante mak seminári, misa no karii ai-funan, tanba liuhusi mate mak ita goza independénsia ne’e.
Komandante PNTL Oé-Cusse, Superintendente Polísia Nicolau Francelino da Costa, afirma momentu importante atu relembra akontesimentu 12 Novembru 199, tanba balun haree ho matan no balu rona de’it akontesimentu ne’e.
“12 Novembru mak mundu rekoñese ita-nia terus, ita mós fó onra ba jornalista Max Stahl, tanba nia ho brani halo filmajen iha akontesimentu 12 Novembru 1991. Antes ne’e, mosu uluk iha Motael 28 Outubru, ativista ida Sebastião Gomes mate, joven ida husi munisipíu Viqueque. Ida-ne’e mak hamosu Masakare Santa Krús”, nia fó hanoin.
Tanba ne’e, ba nia, 12 Novembru sai hanesan ezemplu ida ba povu Timor-Leste atu sakrifika aan liuhusi atividade oioin hanesan daudaun hala’o diálogu atu kontribui ba nasaun ne’e.
Nia hateten, tempu agora, la’ós atu hakilar malu, maibé atu dezenvolve aan no prepar rekursu umanu hodi lori nasaun ne’e ba oin. “Para ona ho hakilar malu, baku malu no tuda malu. Akontesimentu ne’e sai hanesan sasukat ida atu Timor-Leste nakfilak ba nasaun no ohin loron ita goza ita-nia maluk sira-ne’ebé mate hodi sosa rai ne’e iha tinan 24 nia laran. Tanba ne’e, joven agora preokupa mak estuda de’it, lalika hanoin atu mete problema tun-sa’e, tanba rai ne’e harii ho ruin no raan. Sira-nia mate mak ohin ita goza rai ida ho naran RDTL”, nia apela.
Notísia relevante: Loron Nasionál Juventude: 12 Novembru nu’udar loron istoriku ba ukun rasik aan
Ajenda prinsipál ba komemorasaun data ne’e mak halo semináriu, kalan reflesaun hodi loke filmajen 12 Novembru 1991, misa iha Igreja Numbei no kontinua kedas karii ai-fuan iha semitériu Santa Krús.
Jornalista: Abílio Elo Nini
Editora: Maria Auxiliadora
