DILI, 12 novembru 2024 (TATOLI) – Antigu Xefe Estadu Maiór Jenerál FALINTIL-Forsa Defeza Timor-Leste, Tenente Jenerál reformadu, Lere Anan Timur, apoia rekonsiliasaun tanba timoroan labele fahe malu, presiza hadomi pás no tenke fó liman ba malu.
“Timoroan ne’ebé hela iha sorin, sira mós hanesan timoroan tanba ne’e ita timoroan ita tenke fó liman ba malu no ha’u dehan katak sira iha ne’ebá ne’e sei hadomi sira-nia rai tanba to’o oras ne’e sira sei ajuda ita kria estabilidade. Tanba ne’e mak ita-nia fronteira laiha problema hodi ita bele ba mai”, Lere Anan Timur hateten ba jornalista sira hafoin partisipa iha serimónia Loron Nasionál Juventude 19 no Loron Masakre Santa Cruz ba dala 33 ne’ebé halao iha Santa-Cruz, tersa, ohin.
Nia afirma, rekonsiliasaun ne’ebé Estadu Timor-Leste halo ho Indonézia ne’e nudar rekonsiliasaun iha nivél Estadu ho Estadu, laos husi ema ida mak manu tali para ita rekonsilia ho nasaun ida-ne’e, maske seidauk iha rekonnsiliasaun ofisiál ba timoroan sira ne’ebé hela iha Kupang.
Lere akresenta katak inisiativa ba rekonsiliasaun ne’e husi ami hotu tanba ami hotu hadomi pás tanba ita hanesan timoroan labele fahe malu.
Lider sira la promove rekonsiliasaun iha rai laran, Lere hatan, ita lalika hanorin lideransa nasionál sira tanba sira ne’e mesak mestre de’it.
“Imi lalika preokupa ida tanba sira ne’e mesak mestre de’it, ita labele hanorin fali ita-nia mestre sira ne’e imposivél, maibé ha’u atu hateten de’it ba imi joven sira mak ne’e saida mak ne’e, ami hakarak husik hela ba imi mak hakmatek no dezenvolvimentu”, nia konklui
Jornalista: Natalino Costa
Editór : Zezito Silva
