BOBONARO, 12 novembru 2024 (TATOLI) – Iha selebrasaun misa eukarístia ba komemorasaun masakre Santa Kruz 12 Novembru ba dala-33, Pároku Santa Kruz Maliana, Munisípiu Bobonaro, Pé Valerio Gusmao, husu ba joven sira agora atu hanoin hikas hodi forma idak-idak nia-aan hodi dezenvolve nasaun Timor-Leste.
Tuir nia, masakre Santa Kruz tinan 30 liu hanesan istória moruk ba Timor-Leste tanba lakon ema lubuk ida, maibé ho sira-nia mate mak vitória ba timoroan hotu hodi deside destinu Repúblika Demokrátika TimorLeste.
Notisía relevante: 12 Novembru fanu joven sira atu afirma nasionalizmu no patriotizmu
“Agora tempu ona ita idak-idak hanoin ho loron ist’oriku hirak ne’e oinsá ita forma ita nia-an sai di’ak, hodi nasaun ida ne’e sai di’ak, tenke iha esperansa nafatin, labele fó sala ba malu, ita idak-idak lori nia-sai ema importante ba nasaun,” Padre ne’e fo hanoin.
Amu-lulik ne’e nota, agora defisíl tebes organiza timoroan sira atu hamutuk tanba mistura ho jerasaun husi nasaun tolu hanesan Japaun, Portugal, Indonézia ne’ebé mai ho karater la hanesan.
“Sa tan jerasaun ida kahur hanesan ida agora ne’e, ita idak-idak buka nia identidade, buka ita nia masa ho hanoin tempu Japaun nia di’ak, iha ami nia tempu Portuges ami hatene lian Portugues, ou ami iha Indonézia nia tempu halo ami eskola hodi duni fali sira sai inimigu,” nia hateten.
Prezidente Autoridade Munisípiu Bobonaro, Alexandrino Pires, hateten loron istoriku ne’e fanun nafatin ita hotu nia sentimentu liuliu servidór estadu sira atu serbi povu tuir sentidu 12 Novembru.
“Ida-ne’e mak importante, tanba 12 ita la ko’alia polítika, ko’alia de’it mate ka moris ukun rasik-aan, viva loriku-asuwain, só ida-ne’e de’it, agora maski ita mai husi jerasaun ne’ebé la hanesan, maibé tenke hanoin ida de’it atu lori nasaun ne’e ba oin,” nia katak.
Nia agradese ba ema hotu ne’ebé partisipa iha selebrasaun misa eukarístia ne’e atu nune’e erói sira ne’ebé liu ona ba mundu seluk kontinua hetan fatin di’ak.
“Bainhira ita hahú misa, ha’u hateke ba kotuk, ha’u tanis, tanba iha tempu ne’ebá ami hamutuk misa hanesan depois ami ba Santa Kruz fahe malu até a data balu seidauk hasoru malu,” nia haktuir.
Hafoin misa, autoridade munisípiu, autoridade sivil, militár, komisaun organiza no joven sira hotu kontinua la’o-ain ba karik ai-funan iha semitériu Santa Kruz Maliana hodi memoriza erói no sobrevivente 12 Novembru sira-nia luta no mate.
Enkuantu kememorasaun masakre Santa Kruz 12 Novembru no loron nasionál joventude tinan ne’e munisípiu Bobonaro hetan alokasaun orsamentu rihun $30-resin no apoia tan orsamentu balu husi autoridade Munisípiu Bobonaro.
Notisía relevante: 12 Novembru 1991: Tane aas valór juventude rezisténsia no partisipasaun igreja iha dezenvolvimentu Estadu RDTL
Jornalista: Sérgio da Cruz
Editór: Evaristo Soares Martins
