CNC no ME organiza kompetisaun sertame matéria istória ba ESJ
DILI, 14 novembru 2024 (TATOLI)–Sentru Nasionál Chega, Institutu Públiku (CNC, I.P) parseria ho Ministeriu Edukasaun (ME) organiza kompetisaun sertame matéria Istória, Direitu Umanu no Edukasaun Sidadania, ba estudante Eskola Sekundáriu Jerál (ESJ) sira nível munisípiu.
Atividade ne’e iha ámbitu loron proklamasaun independénsia ba dala-49, hodi foin-sa’e sira bele apreende no hatene istória pasadu nian.
“Objetivu prinsipal husi kompetisaun sertame ne’e nu’udar forma ida atu motiva estudante sira apreende istoria ne’ebé akontese iha pasadu hodi hametin nasionalizmu, patriotizmu no sai sidadaun di’ak, inklui sai sidadaun ne’ebé hakribi ba violénsia hodi kontribui ba pás iha sosiedade,” Diretór Ezekutivu CNC, I.P, Hugo Maria Fernandes, hateten hafoin abertura atividade, iha salaun CNC, Balide, kinta ne’e.
Notísia relevante : CCLN Bobonaro sei realiza sertame hodi komemora loron veteranu
Objetivu seluk maka nu’udar forma ida atu disemina narativu istóriku sira ne’ebé prezerva ba publiku, liu-liu estudante sira atu hatene no apreende istória hodi banati no la repete hahalok sira ne’ebé akontese iha pasadu.
“Tanba ne’e, kompetisaun sertame nu’udar parte ida mos husi programa memorializasaun integradu ne’ebé hatete atu prezerva memória istóriku liuhusi arkiva no determina narativa sira ba públiku. Atu fasilita prosesu kompreensaun komún kona-ba politika no programa sira oinsá mak utiliza memória istoriku sira. Tanba istória no memória sai referénsia ba estudante sira atu apreende, liu-liu oinsá mak uza dokumentu narativu istóriku sira hodi kontribui ba justisa no pás iha Timor-Leste,” nia esplika.
Atividade sertame ne’e hala’o hodi hatán ba atribuisaun knaar husi dekretu lei nú. 48/2016 neʼebé dehan, contribuir, no âmbito das suas competências, para a educação civica, formação e metodologias de ensino no que se refere à historia de Timor-Leste no periodo de 1974 e 1999 e aos direitos humanos, promover a continuidade da disseminação e socialização do relatório Chega! e outros istrumentos de divulgação produzidos pela CAVR e pela CVA.
Iha soein seluk, Diretór Jerál Ensinu Sekundáriu Jerál, Deolindo da Crus, hateten, kompetisaun sertame ida-ne’e atu eleva liután estudante sira-nia koñesimentu, nune’e mós atu sira bele apreende nafatin istória Timor nia.
“Atividade ida-ne’e realiza atu ita hatene ita-nia oan sira-nia koñesimentu ne’e to’o iha ne’ebé, nune’e mós oinsá ita-nia estudante sira husi eskola oin-oin bele mai partisipa para promove sira-nia koñesimentu, partilla sira nia koñesimentu liga ho disiplina ne’ebé iha, ao mezmu tempu atu sira hatene istória no identidade liga ho prosesu ba luta ukun rasik-an nian,” nia dehan.
Sertame ne’e importante tanba husi Ministériu Edukasaun nia observasaun joven foin-sa’e sira barak mak ladún interese atu koñese no apreende nia identidade no istória rasik tanba ne’e mak eventu hanesan ne’e importante tebes.
“Tanba ne’e mak ita bele loke oportunidade ba ita-nia estudante sira para atu mai kompete oinsá sira bele hatudu sira-nia koñesimentu ho nia kolega sira oinsá mak partilla”, nia tenik.
Atividade ne’e partisipa husi estudante ensinu sekundariu sira husi munisipiu Dili, Aileu, Ermera, Lauté, Baucau, Manatuto, Bobonaro, Viqueque, Lauté no Liquiçá.
Jornalista : Osória Marques
Editora : Julia Chatarina
