BOBONARO, 18 novembru 2024 (TATOLI) – Xefe aldeia Manu-Aman, suku Tapo-Memo, postu administrativu Maliana, munisípiu Bobonaro, Marçal Lau Saka Noronha, lori komunidade nia naran agradese ba Governu tanba ho implementasaun projetu moru protesaun mota bele salva ona estrutura ponte Nunura no komunidade nia natar ektare 10 bainhira akontese udan-boot agora no ba futuru.
Tuir nia, implementasaun obra ne’e bele responde ona preokupasaun komunidade tanba iha tinan hirak liubá kotuk, korrente mota Malibaka no Bebai sempre fó ameasa ba ponte Nunura no lori-lakon rai natar fatin ne’ebé durante ne’e agrikultór sira utiliza hodi prodús hare.
Notísia relevante: Volume mota hosi Indonézia kontinua sobu ponte Nunura
“Ha’u sente orgullu no agaredese ba Governu tanba salva tiha komunidade nia natar ektare 10-resin iha parte leten no ponte Nunura,” nia informa ba jornalista sira iha Nunura, segunda ne’e.
Lau Saka, observa katak durante implementasaun obra, kompañia tolu ne’e servisu tuir dezeñu no Bill Off Quantity (BOQ) husi Ministériu Obra Públika nia.
Xefe aldeia ne’e rekomenda ba Governu atu kontinua hatutan projetu ne’e hodi preteje di’ak liután ponte Nunura no rai-natar fatin.
“Ida agora ne’e metru 600-resin de’it, ita hanoin fali sé karik mota Bebai mai maka’as Malibaka intupidu, entaun impaktu ne’e mai fali komunidade nia natar no ponte Nunura, tanba bee maka’as entaun Malibaka nia ne’e halai fali ona mai natar-laran, depois natar iha parte ponte kraik ne’e mós foin lalais bee lori hare sira-ne’e,” nia fó hanoin.
Enjeñeiru Kompañia Maliana Brother Unipesoál Lda, Ricardo Nes, hateten durante ne’e servisu fíziku kuaze la’o ho di’ak, maibé atrazu oituan tanba udan.
“Ami agora ida-ne’e faze finishing, ami tarjetu semana oin hotu, tanba hela de’it rohan, ami garantia ninia iha kualidade tanba ami-nia servisu tuir espesifikasaun husi laboratóriu nasionál, horibainhira cor ne’e mós sira mai,” nia hateten.
Obra fíziku ne’ebé sira responsabiliza, daudaun ne’e foin to’o faze hada sa’e metru rua tanba kestaun udan.
“Ami horisehik mai bee-taka metin tiha, ami tenke hamoos fali, maibé ami kompañia esforsu nafatin hodi garante kualidade no finaliza tuir tempu,” nia hakotu.
Barrajen ne’e sa’e metru 5,30 ho nia naruk metru 600-resin ne’ebé responsabiliza husi kompañia tolu hanesan Marshela Unipesoál Lda ho kustu $330,862.73, Maliana Brother $304,789.31 no Zhencya Unipesoál Lda ho kustu $300-resin.
Notisía relevante: IGEADI halo ona intervensaun salva estrutura ponte Nunura
Jornalista: Sérgio da Cruz
Editór: Evaristo Soares Martins
