DILI, 18 novembru 2024 (TATOLI)—Parlamentu Nasionál (PN) aprova proposta Orsamentu Jerál Estadu (OJE) 2025 hamutuk $15,000,336 ba Ministériu Interiór (MI) iha faze espesialidade ho votu afavór 44, kontra 0, abstensaun 19.
Notísia Relevante: Tinan 2025: MI kontinua fó prioridade konstrusaun-reabilitasaun postu seguransa iha fronteira
“Ne’ebé, orsamentu MI pasa,” Prezidente Parlamentu Nasionál, Maria Fernanda Lay fó sai iha debate proposta OJE 2025 faze espesialidade, segunda ne’e.
Orsamentu ho montante $15,000,336 ne’e aloka ba saláriu vensimentu $12,276,037, bens no serbisu $2,158,319, kapitál menór $40,184 no kapitál dezenvolvimentu $525,796.
Husi orsamentu ne’e hodi finansia programa seguransa nasionál ho sub-programa seguransa no patrimóniu Estadu ho atividade haat (4), sub-programa prevensaun konflitu komunitáriu no konstrusaun pás ho atividade sira, sub-programa serbisu migrasaun ho atividade haat (4), sub-programa seguransa rodaviáriu ho atividade haat (4).
Programa funsionamentu no dezenvolvimentu instituisionál ho sub-programa tolu (3) no atividade 15.
Orsamentu PNTL $46,420,430 pasa
Aleinde ne’e, Parlamentu Nasionál aprova mós orsamentu $46,420,430 ba Polísia Nasionál Timor-Leste (PNTL) ho votu afavór 45, kontra 0 no abstensaun 18.
Orsamentu $46,420,430 ne’e hodi aloka ba saláriu vensimentu $39,924,528, bens no serbisu $6,354,902, transferénsia públika rihun $141.
Orsamentu ne’e atu finansia programa seguransa nasionál ho sub-programa operasaun seguransa interna ho atividade rua (2), sub-programa jestaun ekipamentu seguransa ho atividade tolu (3), sub-programa alimentasaun no razaun kombate operasionál ba PNTL ho atividade ida (1), sub-programa jestaun seguransa terrestre no kosteria Timor-Leste ho atividade ida (1), sub-programa vijilánsia no prevensaun krime iha tasi ho atividade ida (1), sub-programa formasaun no dezenvolvimentu rekursu umanu PNTL ho atividade rua (2), sub-programa polísia komunitária ho atividade rua (2), sub-programa prevensaun kriminál, serbisu investigasaun no informasaun ho atividade ida (1).
Programa funsionamentu no dezenvolvimentu instituisionál ho sub-programa ida (1) no atividade haat (4).
Programa inkluzaun sosiál ho sub-programa implementasaun NAV-GBV ho atividade ida (1).
Aumenta polísia ida kada suku
Entretantu, Deputada PD, Maria Teresa Gusmão, parabeniza ba PNTL nia hala’o serbisu di’ak tebes iha terrenu maske hasoru dezáfiu balun iha terrenu, nune’e liuhusi OJE 2025 hakarak rekomenda pontu importante sira hanesan presiza dezenvolve kultura serbisu koletivu liuliu atua konflitu ba joven no komunidade presiza haree medida no mekanizmu, ho promosaun no kadernizasaun, estabelese kamára CCTV fasilita serbisu investigasaun krime, atensaun infraestrutura, fasilidade transporte, kapasitasaun no aumenta membru polísia ida iha kada suku iha territóriu hodi redus krime.
Deputadu FRETILIN, Antoninho Bianco, husu presiza tau atensaun ba membru PNTL sira ho moras atu bele hetan tratamentu di’ak, nune’e liuhusi OJE ne’e nafatin husu kontinua halo prestasaun sebisu seguransa ba nasaun.
Deputada KHUNTO, Olinda Guterres, mós husu apoiu liután transporte hodi apoiu serbisu membru polísia sira iha baze.
Deputadu CNRT, Natalino dos Santos, apresia iha orsamentu tinan ministériu kontinua tau prioridade liuhusi fundu infraestrutura prevee ona iha projetu 123 ba reabilitasaun postu 94 iha fornteira no 65 postu, eskuadra iha territóriu ho fazedamente.
Deputadu FRETILIN, Antoninho Doutel Sarmento, husu tau atensaun ba kondisaun Ofisiál Polisiamentu Suku (OPS) oinsá hamenus no garante rezolve poblema.
Ministru Interiór, Francisco da Costa Guterres, dehan preokupasaun sira-ne’e haree hela tau atu atensaun no iha estatutu ne’ebé promulga ko’alia hotu kestaun sira-ne’e hanesan promosaun, nune’e hahú iha 2025 komesa implementa estatutu ne’ebé iha.
Kona-ba rekrutamentu PNTL, Governante ne’e dehan, tinan oin sei fó sai rekrutamentu ba membru foun hamutuk na’in-250.
Notísia Relevante: Rekrutamentu membru PNTL foun sei anúnsiu iha 2025
Jornalista : Nelson de Sousa
Editór : Cancio Ximenes
