UNTL tenke moderniza sistema ensinu
DILI, 18 novembru 2024 (TATOLI) – Ministru Ensinu Superiór Siénsia no Kultura (MESSK), José Honório hatete, tempu to’o ona Universidade Nasionál Timor Lorosa’e (UNTL) moderniza sira-nia sistema ensinu.
“Atu moderniza sistema ensinu iha UNTL ne’e UNTL rasik ho reitór no estrutura tomak mak tenke hanoin, tenke hadi’a, tanba UNTL hanesan universidade públiku ne’ebé Governu tinan-tinan sempre fó apoiu no dalabarak ha’u hatete ba sira tenke hadi’a jestaun, tenke moderniza prosessu aprendizajen UNTL, tanba UNTL mós iha buat barak falta hela nune’e ha’u husu ba sira atu haree ida-ne’e ho di’ak. Sira tempu to’o ona atu moderniza sistema ensinu sira,” Ministru José Honório, hatete, iha Hotel Timor, segunda ne’e.
Notísia relevante:UNTL oferese formasaun ba funsionáriu hodi hasa’e koñesimentu legál
Governante ne’e hatutan, Prezidenti Repúblika (PR) José Ramos Horta, husu UNTL moderniza ninia sistema ensinu tanba ensinu superiór privadu sira balun ne’e sira-nia prosesu aprendizajen modernu tebes.
“Tanba ne’e mak Prezidente Repúblika husu ne’e loos, ne’ebé UNTL hakaas aan ho estrutura ho reitór, vise reitór, pro-reitór, iha dekanu, vise-dekanu, iha diretór departamentu, vise-diretór departamentu, entaun ema hirak ne’e bele moderniza ona ida-idak nia fakuldade ho orsamentu ne’ebé Governu fó apoiu kontinua hadi’a para eleva ninia kualidade iha futuru,” dehan ministru.
Reitór UNTL, João Soares Martins hatete, kona-ba moderniza UNTL ne’e daudaun la’o hela no sei moderniza fazeadamente.
“Ami hahú ona ba prosesu dijitalizasaun, ne’ebé ami lansa iha semana kotuk ne’e, ita hakat ho pasu ida-ne’e hodi dijitaliza administrasaun akadémika, administrasaun finanseira, projetu, lojístika, patrimóniu, nune’e ema hotu bele asesu ho fasil no lais liu, maské dezafiu barak mak ita hasoru, maibé espiritu mak forte no esforsu husi sívitas akadémika tomak ita sei la’o neineik hodi moderniza UNTL,” nia dehan.
Reitór estabelesimentu públiku ne’e hatutan, atu moderniza ba infraestrutura ida-ne’e presiza investimentu ida-ne’ebé boot, entaun Governu mós tenke tau osan boot nune’e bele moderniza sala-aula, sala-enkontru no seluktan.
Prezidente Repúblika José Ramos Horta, husu Governu atu tau-matan ba UNTL, liu-liu halo investimentu iha infraestrutura hodi moderniza liután sistema ensinu.
PR Horta dehan tinan-20 resin, UNTL prodús ona 40 mill estudante, populasaun Timor nian, númeru ida-ne’e bo’ot tebes signifika la’ós fasil halo jestaun, tanba ne’e presiza governu nia tulun atu tau-matan ba universidade referida.
“Ha’u husu ba governu atu haree tau-matan di’ak liután ba Universidade Nasionál Timor Lorosa’e atu UNTL nia infraestrutura di’ak liután, bele haree insentivu materiál ba profesór sira, haree mós insentivu ba ekipamentu bele moderniza liután sistema ensinu,” Horta dehan.
PR Horta afirma, kada tinan UNTL sempre selebra tinan, maibé presiza atu haree kotuk saida mak universidade ne’e halo ona, no saida mak seidauk, no saida maka tenke halo no halo oinsá, no halo ona saida, liu-liu pertense ba Estadu, tanba universidade públiku.
Tanba ne’e mak Estadu tenke konsentra nia antesaun ba UNTL, atu sai universidade ida nivél rejionál ranking boot iha sudeste aziátiku nian.
Notísia relevante:UNTL propoin estudante 4.095 tinan letivu 2025 ba MESSK
Jornalista : Osória Marques
Editór: Rafael Ximenes de A. Belo
