Autoridade RAEOA la koopera ho mídia ba asuntu kobertura sira
OÉ-CUSSE, 19 Novembru 2024 (TATOLI) – Jestór Rádiu Komunidade Atóni Lifau (RCAL), José Francisco Efi, preokupa ho Autoridade Rejiaun Administrativa Espesiál Oé-Cusse Ambeno (RAEOA) tanba laiha kooperasaun di’ak ho jornalista sira atu halo kobertura ba atividade sira-ne’ebé autoridade sira organiza.
Dirijente RCAL ne’e hato’o nia preokupasaun iha ámbitu enkontru ho Prezidente Konsellu Imprensa Timor-Leste, Otélio Ote, iha edifisíu RCAL, iha bairru Oésono-Oé-Cusse.
“Ita haree katak dala barak ita-nia na’i-ulun sira iha ne’e [RAEOA], balun ladún koopera di’ak ho mídia no ladún fó informasaun ne’ebé di’ak ba mídia sira. Entaun, kolega jornalista barak mak la hato’o kestaun ne’e atu ita-nia povu hatene informasaun ne’ebé akontese iha rai ne’e”, José Efi lamenta.
Notísia relevante: KI diskute asuntu haat ho jornalista destakadu sira iha RAEOA
Tanba ne’e, nia rekomenda ba Konsellu Imprensa atu hala’o sosializasaun hodi introdús ba entidade hotu iha rai-ketan ne’e, liuliu autoridade RAEOA atu entende knaar jornalista sira-nian.
“Prezidente KI mós enkoraja jornalista sira katak jornalista iha Oé-Cusse mak tenke kria ona embriaun ida, nune’e ita-bele hato’o ita-nia difikuldade sira bainhira hasoru problema ruma iha Oé-Cusse. Tanba ita ko’alia loloos atividade sira-ne’ebé agora boot sira hala’o iha ne’e laiha protókolu ida atu ita asesu ajenda ofisiál sira. Ita haree sira [autoridade] la’o mesak-mesak halo atividade, la konvida jornalista sira, maske loloos atividade ne’e merese públiku atu hatene”, nia realsa.
Nia mós salienta katak nu’udar jornalista iha Oé-Cusse prontu atu halo kobertura ba atividade ba komemorasaun Loron Proklamasaun Independénsia iha 28 Novembru, ne’ebé realiza iha Oé-Cusse, mak hanesan preparasaun ba kompetisaun korrida cavalo, motocross, nune’e bele tranzmite ba públiku.
“Maibé, ajenda sira-ne’e daudaun ita seidauk hetan. Ita atu hetan husi sé? Sé mak sai fonte importante atu jornalista sira bele halo kobertura, tanba selebrasaun 28 Novembru tinan ne’e iha Oé-Cusse. Maibé, nu’udar jornalista sei esforsu oinsá bele hetan informasaun sira, nune’e bele ajuda ita-nia Governu atu hato’o programa sira-ne’ebé sei akontese iha Novembru ne’e nia laran”, nia kestiona.
Notísia relevante: KI atribui prémiu jornalizmu ba jornalista no media vensedór sira
Iha fatin hanesna, jornalista Orlando Oqui husi RTTL, E.P, reforsa katak KI presiza atu hala’o sensibilizasaun ba entidade sira, liuliu autoridade RAEOA.
“Ida-ne’e impaktu tanba mudansa estrutura. Uluk ita haree atendimentu ba mídia di’ak, liuliu ajenda sira ita asesu. Agora, tanba estrutura foun, entaun mai ho sira-nia polítika rasik, sira haluha mídia, tanba durante ne’e serimónia ka ajenda urjente mak barak liu”, nia dehan.
Hatán ba preokupasaun sira-ne’e, Prezidente Konsellu Imprensa Timor-Leste, Otélio Ote, hateten, Konsellu Imprensa komunika ona ho Prezidente Autoridade RAEOA, Rogério Lobaro, maibé seidauk iha disponibilidade tanba sei partisipa hela iha debate orsamentu 2025 nian.
“Konsellu Imprensa koordena ona ho Prezidente Autoridade RAEOA atu hala’o enkontru ofisiál ida iha semana ne’e, maibé informasaun husi Gabinete katak seidauk iha tempu tanba daudaun ne’e partisipa hela iha debate Orsamentu Jerál Estadu iha Parlamentu Nasionál. Ba oin ami sei esforsa atu hato’o rekomendasaun sira ne’e”, nia promete.
Notísia relevante: CI atribui karteira profisionál ba jornalista na’in-hitu iha RAEOA
Jornalista: Abílio Elo Nini
Editora: Maria Auxiliadora
