OÉ-CUSSE, 18 Novembru 2024 (TATOLI) – Prezidente Konsellu Imprensa (KI) Timor-Leste, Otélio Ote, hala’o enkontru ho jornalista destakadu sira iha Rejiaun Administrativa Espesiál Oé-Cusse Ambeno (RAEOA) hodi diskute asuntu haat, liuliu ba kondisaun jornalista sira iha rai-ketan ne’e.
“Prezensa KI iha Oé-Cusse parte husi ami-nia mandatu, ne’ebé ami tenke hatene kondisaun mídia iha Oé-Cusse nomós hatene kona-ba oinsá sira-nia relasaun ho autoridade RAEOA no sidadaun sira-nia entuziazmu atu simu ezisténsia mídia iha Timor-Leste”, Otélio Ote dehan ba jornalista sira hafoin remata enkontru iha Rádiu Komunidade Atoni Lifau (RCAL), ohin.
Asuntu haat ne’ebé aborda iha enkontru ne’e mak kompeténsia KI nian, karteira profisionál ba jornalista sira, direitu resposta no retifikativu no futuru eleisaun ba mandatu foun KI nian.
“Ami agradese tanba enkontru ohin la’o ho pozitivu tebes, jornalista sira-ne’ebé iha ne’e marka prezensa hodi ami ko’alia kona-ba KI nia kompeténsia no mandatu, karteira profisionál. Ami mós ko’alia direitu resposta no direitu retifikativu, ko’alia mós kona-ba prosesu eleisaun ba membru KI foun iha períodu 2025-2029”, nia esplika.
Iha reuniau, KI hato’o mensajen ba jornalista sira atu hatuur loloos kompromisu ba divulgasaun informasaun kona-ba progresu servisu mídia iha rai ketan Oé-Cusse Ambeno, tanba kada loron jornalista sira hatudu produtu jornalístiku iha plataforma mídia idak-idak.
Iha sorumutu ne’e jornalista sira mós ko’alia dezafiu ne’ebé sira enfrenta no hato’o mós sujestaun ba KI atu sensibiliza papél jornalista ba entidade sira. “KI iha responsabilidade atu eleva kapasidade téknika, profisionál no intelektuál husi mídia sira iha fatin hotu-hotu atu hametin komunikasaun ho instituisaun no autoridade relevante sira iha Oé-Cusse atu iha kondisaun ida-ne’ebé mídia ho autoridade iha kooperasaun di’ak hodi divulga informasaun ba públiku, tanba buat ne’ebé mundu enfrenta mak informasaun sira-ne’ebé laloos, miss komunikasaun”, nia hateten.
Iha biban ne’e, Jestór Rádiu Komunidade Atóni Lifau, José Francisco Efi, dehan prezensa CI iha Oé-Cusse bele fanun jornalista sira oinsá kontribui ba prosesu dezenvolvimentu liuhusi produtu jornalístiku.
“Ohin hato’o preokupasaun ba KI, liuliu karteira profisionál no knaar jornalista hala’o iha Oé-Cusse, tan ne’e mak ita agradese tanba ohin KI mós halo anotasaun, nune’e ba oin sira bele hato’o ba autoridade kompetente atu haree no koopera liga ho produsaun informasaun sira-ne’ebé publika ona iha rejiaun ne’e”, nia realsa.
Notísia relevante:Konsellu Imprensa atribui tán karteira ba jornalista 11 no dada 15
Jornalista ne’ebé marka prezensa iha enkontru ne’e mak husi Ajénsia Tatoli, I.P, Abílio Elo Nini, RTTL. E.P mak Egídio Nono no Orlando Oqui, STL Yoseph Koa, Timor Pos Ermelinda Caet, RCAL José Francisco Efi ho José Maria Feno husi RCAL no Ermelinda Colo Jefriano Leonardo Lasi husi mídia One Timor.
Ofisiál Mídia sira mak José Mala no Felisberto Eco husi mídia Prezidente Autoridade RAEOA, João Caunan husi mídia Sekretaria Rejionál Agrikultura no Paulino Cono Falo husi Sekretaria Rejionál Edukasaun no Asuntu Sosiál.
Jornalista: Abílio Elo Nini
Editora: Maria Auxiliadora
