DILI, 04 outubru 2023 (TATOLI) – Konsellu Imprensa (CI, sigla portugés), atribui tán karteira profisionál ba jornalista na’in-11 no dadan ona karteira hosi jornalista 15 tanba halo ona funsaun seluk.
“Ami halo ona karta ba hirak ne’ebé mak agora daudaun la halo ona funsaun jornalista liuliu halo servisu profionál jornalizmu nian iha midia komunikasaun sosiál, maibé sira halo fali funsaun seluk hodi apoia gabinete ministeriál, iha ema na’in-15 mak ami dada fali ona sira nian karteira profionál no ohin ami atribui tan karteira ba jornalista hamutuk 11”, Otelio Ote, bainhira partisipa atribuisaun karteira profisionál ba jornalista nain-11 iha Golden Stard, Audian kuarta ne’e.
Jornalista sira ne’ebé mak hetan karteira profisionál hosi KI, mai hosi mídia Komunikasaun Sosiál hanesan Rttl, EP na’in-10 no jornalista Agência Notisioza TATOLI, IP na’in-ida no sira be’ebé la halo ona servisu jornalizmu, Konsellu Imprensa husu atu entrega hotu karteira profisionál.
“Ami agora daudaun notifika tán ema na’in-neen para hatama fila fali sira nia karteira profionál, tanba sira agora la halo ona atividade jornalizmu, maibé halo fali atividade seluk”, nia adianta.
Iha diskursu Prezidente Konsellu Imprensa, Otelio Ote, dehan karteira profisionál ne’e importante tanba hanesan identidade ida ba jornalista sira ne’ebé halo profisaun jornalizmu iha meiu komunikasaun sosiál.
Nia esplika, jornalista nia funsaun mak buka, rekolla haerek no edita, hodi publika ba públiku liuhosi meiu komuniasaun sosiál, Konsellu imprensa halo esforsu atu halo atribuisaun karteira ba jornalista atu labele husik ema inflitra tama profisaun hanesan jornalista.
“Ita halo prosesu atribuisaun karteira profionál, ida-ne’e ema sempre kestiona hela de’it, maibé ha’u atu dehan de’it katak karteira profionál ida-ne’e hatudu katak jornalista ida halo nia kna’ar hanesan ema profionál kompara karik hanesan ema médiku tanba ita halo kna’ar besik liu povu”, Otelio Ote iha nia intervensaun bainhira partisipa atribuisaun karteira profisionál ba jornalista na’in-11 iha Audian, kuarta ne’e.
Nia husu ba jornalista sira, midia na’in sira atu koopera ho Konsellu Imprensa atu identifika nia jornalista sira atu bele hetan karteira profisionál.
“Husu ba jornalista kontinua halo servisu di’ak atu oferese informasaun ne’ebé di’ak ba povu no husu mós mídia nain sira atu kontinua koopera ho Konsellu Imprensa”, nia dehan.
Iha fatin hanesan, reprezentante jornalista na’in-11 ne’ebé hetan karteira profionál, Ines das Dores, hateten karteira profisionál ne’ebé KI atribui ba jornalista sira nu’udar rekoñesimentu ida hosi KI jornalita ne’ebé halo funsaun profisionál iha meiu komunikasaun sosiál hanesan RTTL EP no TATOLI, I.P.
Ines hateten, ho rekoñesimentu ida-ne’e hanesan responsablidade ida ne’ebé prega metin iha ami nia isin lolon hodi halo kna’ar ho di’ak liután iha meiu komunikasauun sosiál no servisu profisionál sira.
“Ami promote, ami sei halo ami nian kna’ar ho responsablidade hodi sai matan, tilun no ibun ba lian laek sira”, nia dehan.
Antes atu simu karteira profisionál jornalista sira tuir kolókiu fulan ida iha Konsellu Imprensa no tenke liuhosi teste eskrita no ezame kompeténsia ne’ebé halo hosi KI.
Bazeia ba lista atualizada hosi Konsellu Imprensa 2023, jornalista sira ne’ebé simu karteira profisionál ativu hamutuk 341 no pendente 41, hosi totál jornalista 382.
Jornalista: Natalino Costa
Editór : Zezito Silva
