COVALIMA, 20 Novembru 2024 (TATOLI) – Servisu Munisipál ba Seguransa Alimentár Covalima organiza feira hodi komemora Loron Mundiál Ai-han. Iha eventu ne’e halo promosaun ba produtu lokál liuhusi kompetisaun kulinária.
Prezidente Komisaun Organizadora, atuál Diretór Servisu Munisipál ba Seguransa Alimentár, Hilário Oliveira, dehan Loron Mundiál Ai-han ba 2024 ho tema “Asegura Inkluzivamente Timor-oan Nia Direitu ba Ai-han Nutritivu, Ba Timor-Leste Ida ne’ebé Prósperu”.
“Ita hahú prepara iha Outubru hodi komemora Loron Mundiál Ai-han. Ita organiza atividade rua hanesan halo promosaun ba produtu lokál no kompetisaun kulinária”, Hilário Oliveira hato’o iha salaun Covek, Bairru Costa, ohin.
Nia esplika katak kompetisaun kulinária ne’e oinsá halo prosesamentu ai-han lokál hodi oferese ba ema atu konsumu ai-han nutritivu. “Prosesa ai-han lokál hanesan ai-farina, hudi no bafo Kay Rala hodi transforma sai fali bolu ne’ebé iha valór ekonómiku duké han ai-han importadu ne’ebé kontamina ho kímiku”, dehan.
Grupu ne’ebé partisipa iha kompetisaun kulinária mak Haburas, Foho Taroman, Tane Tetuk no Holha, ne’ebe mai husi postu administrativu Fatumea, Fohorem, Tilomar no Suai.
Ba grupu vensedór dahuluk komisaun sei fahe prémiu monetáriu $50, daruak $40, datoluk $30 no dahaat $20. Manán-na’in sira ne’e sei simu mós ekipamentu dapur nian hanesan sanan, bikan, kanuru, kanedok, kaneka, travesa no fini modo.
Sekretáriu Munisipál Asuntu Sosiál no Organizasaun, Filomeno Cardoso, dehan tuir loloos Loron Mundiál ba Ai-han monu iha 16 Outubru. “Maibé, ita foin mak komemora tanba okupadu ho serbisu sira seluk, tanba ne’e ohin ita selebra hodi haree ita-nia seguransa alimentár hodi haforsa ai-han lokál ne’ebé ho nutriente”, dehan.
Loron Mundiál ba Alimentasaun selebra kada tinan, dezde 1981, 16 outubru. Data ne’e komemora iha nasaun 150 ho objetivu alerta no konxiensializa opiniaun públika ba kestaun sira globál relasionada ho alimentasaun no nutrisaun.
Notísia relevante: Selebrasaun Loron Mundiál ba Ai-han iha Covalima ho kompetisaun kulinária
Jornalista: Celestina Teles
Editora: Maria Auxiliadora
