DILI, 20 novembru 2024 (TATOLI)–Diretór Jerál Ambiente iha Ministériu Turizmu no Ambiente (MTA), Francisco Xavier Ximenes Soares, hateten diresaun rekolla ona óleu foer iha kapitál no sentru elétrika Hera hamutuk litru rihun 800.
Notísia Relevante: SEA husu empreza ofisina sira labele soe óleu foer arbiru
Responsável ne’e hateten, óleu foer sira-ne’e diresaun rekolla iha ofisina karreta no motor sira-nian iha kapitál Dili no sentru produsaun elétrika iha Hera.
“Kuantidade óleu foer ne’ebé diresaun ambiente rekolla mak litru rihun 800 ne’ebé tau hela iha tanke neen iha Tibar,” diretór ne’e hato’o ba jornalista sira nakait ho serimónia operasionalizasaun keima lixu ospitalár uza mákina inzeneratór liuhusi simulasaun video, iha Vila Verde.
Nia dehan, óleu foer sira-ne’e agora akumula hela iha Tibar hodi hein prosesu resiklajen ba gazoel.
“Ita halo hela aproximasaun ho Autoridade Nasionál Petróleu no Minerál oinsá atu garante nia kualidade, bainhira halo resiklajen atu reutiliza fali,” nia dehan.
Tuir nia, óleu foer sai atensaun boot no sai preukupasaun mós ba ema hotu, tanba iha fulan hirak liubá midia sosiál hatudu katak óleu iha sentru eletrisidade Hera fakar sai.
“Entaun, diresaun ba haree, tanba bele fó impaktu ambientál no lori ba tasi ne’ebé bele sai ameasa boot ba biodiversidade tasi nian hanesan ikan no animál tasi nian. Daudaun ne’e, ita prepara hela iha Tibar ne’ebá. Ita prepara hela tanke neen ne’ebé atu transforma óleu sira-ne’e ba gazoel,” nia hateten.
Diretór ne’e garante, Governu serbisu ho empreza ida husi Xina halo hela konstrusaun hodi bele halo resiklajen ba óleu foer.
Notísia Relevante: Kompañia Lelo Construction entrega tanke deskarregamentu Sluge Óleu Foer ba SEA
Jornalista : Jesuína Xavier
Editór : Cancio Ximenes
