DILI, 16 marsu 2023 (TATOLI)— Kompañia Lelo Constraction Unip,Lda entrega tanke deskaregamentu Sluge Óleu Foer ba Sekretária Estadu Ambiente (SEA) liuhosi Diressaun Nasional Kontrolu Polusaun Ambiente (DNCPA, sigla portugés), hafoin ramata ninia konstrusaun ne’ebé lao durante fulan neen.
Kompañia entrega rezultadu projetu konstrusaun no reabilitasaun ba tanke deskaregamentu Sluge Óleu Foer ne’e hala’o kuarta (15/03) iha Tibar no projetu refere ninia konstrusaun ne’ebe lao durante fulan neen hahú hosi tinan kotuk no tanke refere sei tau iha Tibar.
Sekretáriu Estadu Ambiente, (SEA) Demétrio do Amaral de Carvalho, hateten, projeitu ne’ebé kompañia halo ba tanke deskaregamentu óleu ne’e halo maske kiik maibé ida ne’e importante loos tanba bele tulun no fó solusaun ba probelma ba óleu rejidual.
“Ohin loron kada tinan ita prodús iha setór eletrisidade iha Betano nomós iha Hera ne’ebé prodús óleu foer kada tinan besik 100 mil litru. Nune’e tanke deskaregamentu Sluge Óleu Foer Tibar ne’e ajuda tebes ita tanba iha fatin ida ne’e deit ita iha tiha ona óleu rejidual. Sé tanke ohin entrega ne’e mak nakonu tan besik ona 1.800.000 litru,” Demétrio do Amaral de Carvalaho hateten liuhosi nota komunikadu ne’ebé Agência Tatoli, asesu kinta ne’e.
Membru Governu ne’e dehan, projetu konstrusaun no reabilitasaun tanke deskaregamentu Sluge Óleu Foer ne’ebé kompañia entrega ona ba SEA, iha posibilidade sei konvida tan empreza sira iha Open Bidding ida iha futuru atu haree empreza di’ak ida hodi halo resiklajen ba óleu rejidual ne’e.
Orsamentu ba konstrusaun projeitu tanke Deskaregamento Sluge Olio Foer ne’e hamutuk $47.000,00.
Serimómia entrega projetu ne’e, halo direitamente hosi Diretór kompañia Lelo Constraction, Unip,Lda, Ladislau das Dores de Jesus ba Diretór Nasional Kontrolu Polusaun Impaktu Ambiental, Nelson Madeira no hetan prejensa hosi Sekretáriu Estadu Ambiente, Demétrio do Amaral de Carvalaho hamutuk ho funsionario DNCPA.
Jornalista : Arminda Fonseca
Editora : Armandina Moniz
