COVALIMA, 25 Novembru 2024 (TATOLI) – Terra no Propriedade Covalima identifika uma-kain hitu afetada ba perfurasaun mina-matan Feto Kmanus rua iha aldeia Tabakolot, suku Debos, postu administrativu Suai, munisípiu Covalima.
Diretór Terra no Propriedade Covalima, Carlos Caetano, dehan, foin lalais, halo ona reuniaun ho Sekretáriu Estadu Asuntu Toponímia no Organizasaun Urbana (SEATOU), Germano Santa Brites, vise-Prezidente Autoridade Nasionál Petróleu (ANP), Quintino Pereira Bere, no autoridade Covalima hodi buka solusaun atu fó indemizasaun ba komunidade afetada ba perfurasaun mina-matan Feto Kmaus rua ne’e.
“Uma-kain hitu mak afeitada ba perfurasaun posu feto Kmaus rua. Husi uma-kain hitu, família haat hela besik iha sentru perfurasaun mina-matan”, Carlos Caetano informa iha Bairru Rompe, ohin.
Dirijente ne’e salienta, hafoin realiza reuniaun, komunidade afeitada ba perfurasaun ne’e asina kedas akta oinsá parte Estadu atende sira ho dignu no sei hetan direitu ba indemnizasaun ba rai, uma hela fatin, plantasaun no ortikultura.
“Komunidade afetada lima mak asina ona akta aseitasaun, na’in-rua seidauk asina tanba la’ós hela iha Suai, maibé iha Dili”, adianta.
Tanba ne’e, SEATOU fó tempu ba uma-kain hitu, hahú iha 22 Novembru to’o 04 Dezembru 2024 mak nafatin la asina akta akordu mak Governu konsidera komunidade la obedese ba Estadu, tanba ne’e sei halo asaun uza ekipamentu hodi sobu.
Terra no Propriedade la simu orientasaun atu hasai notifikasaun ba komunidade afeitada ba perfurasaun posu Feto Kmaus rua, maibé Terra no Propriedade hamutuk ho Prezidente Autoridade Covalima halo enkontru komunitáriu no halo akta aseitasaun no komunidade rasik prontu atu koopera hodi entrega fatin liuhusi prosesu indemnizasaun.
Notísia relevante: Komunidade afetada ba perfurasaun posu Feto Kmaus rekomenda pontu balun ba Timor Resources
Jornalista: Celestina Teles
Editora: Maria Auxiliadora
