DILI, 26 novembru 2024 (TATOLI) – Prezidente Repúblika (PR), José Ramos Horta, ho Embaixadór Timor-Leste ba Brunei, tersa ne’e, diskute kona-ba investimentu haki’ak manu iha Timor-Leste (TL)
“Ami mai hasoru malu ho Prezidente Repúblika, José Ramos-Horta, atu ko’alia kona-ba investimentu ne’ebé maihusi li’ur, husi Brunei,” Embaixadór Timor-Leste ba Brunei Darusalam, Abel Guterres, dehan iha palásiu prezidensiál, Bairru-Pite, Dili.
“Ita hein katak loron 29, sei halo prosesu atu hala’o investimentu iha Timor-Leste, ne’e sei hala’o iha Munisípiu Baucau, sei hahú uluk iha Munisípiu ida, labele hahú iha fatin hotu-hotu. Depois la’o tiha maka haree atu halo mós iha Munisípiu sira seluk. Investimentu ne’e halo iha área hakiak manu. Ha’u hein katak, jornalista sira sei iha oportunidade para loron 29, bele ba haree no fó relatóriu boot liután ba Públiku sira iha Baucau,” Embaixadór ne’e esplika.
Investór ne’e maihusi Brunei Corporations, baze iha Brunei.
Tuir diplomata timoroan ne’e katak kapitál tenke iha investimentu ne’e, hahú husi ki’ik maka sa’e ba boot. “Rai ektare hirak ne’e nee, prosesu sei ho organizadór sira, tanba sira maka organizadór, depois maka imi bele hatene ba públiku,” nia hateten.
Diplomata Abel Guterres rekorda, durante sorumutu ho Prezidente Repúblika katak “Prezidente Repúblika sempre fó korajen, no fó bem-vindu ba investór ne’ebé de’it maka hanoin hakarak atu mai tau sira-nia osan iha ita nia rai, tanba ita presiza investimentu para bele fó servisu ba ita nia ema sira, tanba ita ema barak maka sai li’ur buka servisu entaun halo nusa maka investimentu ne’e bele tama para bele fó oportunidade ba ita nia ema servisu iha ne’e, halo produsaun iha ne’e.
Ba nia, nu’udar Embaxadór Timor-Leste ba Brunei, nune’e oinsá fasilita investór mai investe iha Timor-Leste hodi kontribui ba servisu ba timoroan.
“Ha’u nu’udar Embaixadór ha’u fasilita lori mai iha ne’e, ema negósiu sira sei hatene atu halo saida, ha’u-nia knaar ne’e oinsá maka ha’u konvense sira para lori mai Timor-Leste, depois mai iha ne’e negósiu hatene, atu halo oinsá,” nia hateten.
“Embaixadór responsabilidade atu ko’alia ho ema konvense nian, para nia mai investe ita-nia rai, katak ita-nia rai ne’e di’ak, ita-nia povu hakarak simu investimentu, ida-ne’e ami nia knaar,” nia realsa.
Kona-ba negósiu, tuir Embaixadór Abel Guterres, “Halo nusa ne’e sira maka hatene. Buat ida garante hanesan ne’e, ema iha vontande hakarak mai tau osan ita-nia rai, ita mós iha vontade atu simu ka lae? Kestaun maka ida-ne’e. Ha’u hein katak, ita sei hakarak simu sira-nia investimentu. Portantu, ida-ne’e hanesan negósiu ema kontratu sira maka sei hatene,” nia argumenta.
Notísia relevante:MNEK konvense hela empreza Brunei atu mai investe iha TL
Jornalista: Osória Marques
Editór : Rafael Ximenes de A. Belo
