OÉ-CUSSE, 26 Novembru 2024 (TATOLI) – Autoridade sira iha Zona Ekonómika Espesiál Dezenvolvimentu Oé-Cusse Ambeno (ZEEDOA), lideradu husi João Mendes Gonçalves, aposta ba dezenvolvimentu turizmu, liuliu transforma Oé-Cusse Ambeno sai destinu prinsipál ba turizmu sustentavel.
“ZEEDOA dedikadu atu transforma Oé-Cusse Ambeno sai destinu prinsipál ba turizmu sustentavel, liuhusi implementasaun estratéjia abranjente ida-ne’ebé foka ba asuntu turizmu nian mak asesibilidade, akomodasaun, atrasaun sira, no autór sira”, João Gonçalves dehan.
Tuir nia, ba asesibilidade, atu asegura viajen ne’ebé laiha problema ba turista sira, nune’e ZEEDOA sei foka ba hadi’a infraestrutura transporte nian. Ida-ne’e inklui hadi’a estrada sira, estabelese opsaun transporte públiku ne’ebé konfiavel no aumenta konetividade aérea ba sidade boot sira. Sinalizasaun no rekursu informasaun sira mós sei disponibiliza atu tulun viajante sira iha navegasaun rejiaun nian ho fásil.
Notísia relevante: ZEEDOA konsulta entidade Oé-Cusse ba relatóriu finál no estabelese PED 2030
Kona-ba akomodasaun sira atu apoia atividade turizmu sira-ne’ebé buras daudaun, ZEEDOA sei lidera dezenvolvimentu ba opsaun alojamentu oioin, inklui otél sira ne’ebé di’akliu, resort sira-ne’ebé konfortavel, eco-lodge sira, no uma bainaka sira-ne’ebé reflete kultura lokál.
“Ekipamentu sira-ne’e sei dezeña atu fornese konfortu no konveniénsia ne’ebé laiha paralelu ba vizitante sira hodi atende ba orsamentu no preferénsia oioin”, hateten.
Ba atrasaun sira, elementu prinsipál ida husi ZEEDOA nia inisiativa mak promosaun ba Oé-Cusse Ambeno nia atrasaun sira ne’ebé kativa mak ekoturizmu no esperiénsia kulturál sira, destaka rejiaun nia beleza naturál ne’ebé furak no patrimóniu kulturál ne’ebé riku liuhusi esperiénsia imerzivu sira.
Atividade sira lazer nian mak dezenvolve trillu natureza nian ne’ebé furak, tasi ne’ebé vibrante, parke sira, no fatin istóriku edukasionál sira.
“Adisionalmente, ami sei hadi’a área sira iha tasi-ibun hodi apoia atividade sira lazer nian, hodi permite turista sira atu goza paizajen tasi-ibun nian enkuantu envolve iha atividade sira iha tasi-ibun hanesan mergullu, peska, no desportu sira iha tasi-ibun”, koordenadór ZEEDOA ne’e salienta.
Nune’e mós kona-ba atividade aventura sira mak oferese oportunidade sira ba trecking, sa’e foho, no enkontru sira seluk ne’ebé buka emosaun ne’ebé hatudu paizajen oioin rejiaun nian.
Notísia relevante: ZEEDOA konklui Relatóriu Estadu Rejiaun no kontinua prepara PED
Kona-ba autór sira, susesu husi ZEEDOA nia inisiativa, turizmu depende maka’as ba partisipasaun husi autór lokál sira, inklui ajente viajen sira, operadór turístiku sira, no matadalan lokál sira.
“ZEEDOA sei kolabora ho parte interesada sira-ne’e hodi dezeña itineráriu no atividade sira-ne’ebé aliña ho interese turístiku oioin no promove ekonomia lokál. Ami mós sei fornese inisiativa sira formasaun nian hodi hakbiit ema lokál sira iha fornesimentu serbisu esepsionál no enrikese turista sira-nia esperiénsia”, afirma.
Atu hatán ba interese oioin hosi vizitante sira, ZEEDOA identifika ona segmentu turístiku xave sira no oferta sira ne’ebé korresponde iha Oé-Cusse Ambeno hodi asegura aprosimasaun ida ne’ebé kompletu ba dezenvolvimentu turizmu.
“Analiza segmentu sira-ne’e, ZEEDOA bele kria esperiénsia sira ne’ebé iha impaktu, personalizadu ne’ebé kumpre interese no espetativa espesífiku sira hosi perfíl viajante oioin. Abordajen segmentadu ida-ne’e permite esforsu sira marketing nian ne’ebé alvu, hodi maximiza potensiál ba envolvimentu no satisfasaun vizitante nian”, realsa.
Dezenvolve produtu turizmu no itineráriu sira
ZEEDOA nia estratéjia dezenvolvimentu sira mak fó prioridade ba minimizasaun ba pegada ambientál, promove esforsu konservasaun nian no asegura katak benefísiu turizmu nian fahe ho komunidade lokál sira.
Aleinde ne’e, ZEEDOA komprometidu atu envolve komunidade lokál sira iha planeamentu no implementasaun inisiativa turizmu nian. “Ida-ne’e garante katak dezenvolvimentu turizmu respeita no reflete nesesidade lokál sira enkuantu hasa’e moris-di’ak sosioekonómiku”, nia afirma.
Ba promosaun nian, ZEEDOA nia estratéjia marketing ne’ebé maka’as sei kria narrativa sira ne’ebé maka’as no uza oioin. “Buat sira hotu tama iha planu ne’ebé ami kontempla prepara hela ba futuru Oé-Cusse nian, maibé importante saida mak ami halo iha ne’e, ba Oé-Cusse sira-nia futuru, tanba ne’e presiza kolaborasaun no importante ba Oé-Cusse oan sira katak sira mak na’in ba dezenvolvimentu”, dehan.
Notísia relevante: Konferénsia rejionál iha Oé-Cusse aborda futuru dezenvolvimentu turizmu relijiozu
Jornalista: Abílio Elo Nini
Editora: Maria Auxiliadora
