COVALIMA, 28 Novembru 2024 (TATOLI) – Servisu Munisipál Jestaun Merkadu no Turizmu loke feira artezanatu no kulinária hodi selebra Loron Proklamasaun Independénsia Timor-Leste iha kampu Ladi.
Diretora Servisu Munisipál Jestaun Merkadu no Turizmu, Teresa Pires, dehan iha selebrasaun loron nasionál sira hanesan 20 Maiu no 28 Novembru, Jestaun Merkadu no Turizmu sempre loke feira hanesan atividade atividade regular ida.
“Ami konvida grupu ne’ebé durante ne’e ami identifika hanesan grupu kulinária halo promosaun ba produtu lokál no grupu artezanatu transforma kakun sai pasta, bikan, buli no seluk tan hodi mai partisipa iha feira ida-ne’e”, Teresa Pires dehan iha abertura feira iha kampu Ladi, ohin.
Servisu Jestaun Merkadu no Turizmu mós halo promosaun ba fatin turizmu komunitáriu ne’ebé durante ne’e identifika ona hamutuk 150-resin. Husi totál ne’e foin halo promosaun ba fatin turizmu komunitáriu 28.
Sítiu turístiku sira ne’e mak Lagoa We Inan Suai Loro, Lagoa Lokon Khora, tasi ibun Kalaboso Suai loro, tasi ibun Laen Tolu, Salele, Alas Tuan Damuk, We Tuda Sala Asa, Lagoa Biku Laran, Mot For, Jardín iha Ministériu Públiku Suai nia oin, postu antigu Mape no edifísiu antigu postu Fatumea.
Orsamentu ba realiza feira ne’e hamutuk $1.578. Atividade ne’e halo abertura ohin no enserra iha loron ne’e kedan.
Grupu 11 mak partisipa ida eventu ne’e no sira mai husi postu administrativu sira hanesan Maucatar, Tilomar no Suai. Postu sira seluk laiha grupu kulináriu no artezanatu atu partisipa iha feira 28 Novembru ne’e.
Notísia relevante: Komemorasaun 28 Novembru fanu timoroan sira-nia espíritu no konxiénsia
Membru Grupu Lalatak Tasi, Ermelinda Soi Fahik, dehan sira hetan kontaktu husi Jestaun Merkadu no Turizmu atu partisipa iha feira hodi promove produtu lokál iha loron nasionál ne’e.
“Ami grupu husi Lalatak Tasi partisipa iha feira hodi aprezenta ami nia produtu lokál hanesan budu-tasi, ikan saboko, akar, manu lalar, ikan lalar, batar fai, aidila da’an no produtu seluk tan husi munisípiu Covalima”, nia relata.
Notísia relevante: Covalima promove produtu lokál liuhusi kompetisaun kulinária
Jornalista: Celestina Teles
Editora: Maria Auxiliadora
