OÉ-CUSSE, 28 Novembru 2024 (TATOLI) – Iha ámbitu komemorasaun Loron Proklamasaun Independénsia Timor-Leste ba da-49, veteranu sira iha Rejiaun Administrativa Espesiál Oé-Cusse Ambeno (RAEOA) dezeja ba Governu atu kontinua hakbesik dezenvolvimentu iha baze, nune’e ferik no katuas sira bele asesu ba bee-moos no estrada.
Veteranu Cipriano António ‘Nikitkena’ husi suku Naimeko, dehan kona-ba kontribuisaaun ba dezenvolvimentu iha Oé-Cusse katak sei koopera hahú husi autoridade lokál to’o autoridade RAEOA, nune’e prosesu dezenvolvimentu la’o.
“Rekomenda ba Governu kontinua halo dezenvolvimentu to’o baze, tanba inan-aman nu’udar ai-riin no fondasi ida hodi sai ponte atu harii nasaun ida-ne’e. Husu husu ba joven foinsa’e sira kolabora hamutuk, labele ódiu malu no baku malu, maibé koopera nune’e bele lori dezenvolvimentu nasaun ne’e ba oin no sai furak liután. Ita nasaun viziña hela país seluk, entaun ita mós tenke hatudu katak ita mós bele”, nia hateten bainhira simu kondekorasaun husi Estadu, iha otél Ambeno.
Iha fatin hanesan veterana Rosa Tefa ‘Fatuk’ apela ba joven feto sira atu kontinua estuda, tanba feto hanesan jéneru ida ne’ebé aban bainrua sei sai inan ida, sei eduka oan sira liuhusi edukasaun família.
“Ba Loron Proklamasaun 28 Novembru, nu’udar inan ida ha’u sente katak durante tinan 24 hahú 1975, ohin ita balun kontente, maibé ita-nia maluk sira-ne’ebé fakar sira-nia raan ba rai ne’e ita fó onra ba sira”, nia dehan.
Tibertio Sasi Sosilo ‘Sasi’ husi grupu Santo António, dehan 28 Novembru iha tinan ne’e Governu deside selebra iha Oé-Cusse no hanesan veteranu importante atu partisipa no orgullu ba timoroan. Ami husu ba joven sira atu fó liman ba malu hodi kontinua luta ba ita-nia futuru atu moris ho dame”, katak.
Lembra katak Governu deside komemora Loron Proklamasaun Independénsia 28 Novembru iha Rejiaun Administrativa Espesiál Oé-Cusse Ambeno. Tema prinsipál ba aniversáriu loron nasionál ne’e mak “Orgullu ba ita-nia identidade no kultura, ita harii futuru liberdade, justisa no esperansa ba ita-nia Povu”.
Notísia relevante: Kombatente Oé-Cusse agradese Estadu tanba valoriza sira-nia luta
Jornalista: Abílio Elo Nini
Editora: Maria Auxiliadora
