BOBONARO, 02 dezembru 2024 (TATOLI) – Fundu Nasaun Unida ba Dezenvolvimentu Labarik (UNICEF, sigla inglés) iha Timor-Leste serbisu hamutuk ho Ministeriu Solidariedade Sosiál no Inkluzasaun (MSSI), segunda ne’e sensibiliza matadalan operasionál direitu partisipasaun adolesente no foinsa’e ho Ema ho Defisiensia (EhD) sira iha munisípiu Bobonaro.
Reprezentante UNICET iha TL, José da Costa, hateten, dokumentu ne’e la’ós de’it hanesan matadalan, maibé hanesan deklarasaun ida kona-ba kompromisu ba inkluzasaun, igualdade no empoderamentu.
Notísia relevante: AHDRO husu sidadaun hotu iha Bobonaro respeita Ema ho Defisiénsia
Matadalan ida-ne’e dezenvolve iha tinan 2022 husi Ministériu Juventude, Desportu Arte no Kultura ho apoia husi UNICEF iha Timor-Leste, madalatan ne’e serve hanesan instrumentu fundamentál ida atu asegura katak adolosente no foinsa’e ho Ema ho Defisiensia sira la’ós de’it rona, maibé partisipa ho signifikativu iha desizaun sira-ne’ebé fó impaktu ba sira-nia moris.
“Ida -ne’e aliña ho ita-nia vizaun, la husik ema ida iha kotuk iha Timor-Leste, iha-ne’ebá sira idak-idak iha abilidade no oportunidade atu hetan susesu kontribui no lidera, iha nível munisípiu, matadalan ne’e importante tanba munisípiu sira mak iha komunidade nia fuan ba asaun,” nia hateten iha atividade ne’ebé realiza iha salaun Maria-Tapo.
Tanba iha polítika transforma ba oportunidade reál ba individu sira liuhusi enkoraja no implementa matadalan asegura katak laiha adolosente ka foinsa’e sira-ne’ebé husik hela iha kotuk.
Nia dehan, eventu ida ohin la’ós de’it hasa’e konsiénsia, maibé hasa’e asaun hamutuk hodi serbisu ba halakon obstákulu fíziku, sosiál no instituisionál ne’ebé impede adolosente, foinsa’e no defisiénsia sira atu partisipa iha sira-nia komunidade.
“Ita tenke ativamente promove, inkluzasaun, asegura fatin públiku sira asesivél no simu ema hotu-hotu, ha’u enkoraja ita hotu-hotu iha-ne’e, atu sai kampiaun ba direitu adolosente no foinsa’e ho defisiénsia sira-nia la’ós hanesan obrigasaun morál de’it, maibé hanesan pasu ida atu harii sosiedade ida forte no inkluzivu,” nia akresenta.
Diretór MSSI Munisípiu Bobonaro, Acacio Barreto, agradese ba parseiru UNICEF ne’ebé realiza eventu ne’e iha ámbitu komemorasaun loron mundiál defisiensia 03 Dezembru ba tinan ne’e.
“Husi programa mudansa adolosente, foinsa’e no ema ho defisiénsia iha Timor-Leste, tanba ita iha komunidade nia lete sempre uza liafuan ne’ebé mak ladún di’ak ba ita-nia maluk Ema ho Defisiénsia, entaun orsida sira aprezenta atu nune’e ita fila fó hatene ba komunidade sira kuandu ita rona liafuan ne’ebé ladún di’ak, kta fó hatene ba sira katak liafuan ne’e labele,” nia katak.
Sekretáriu Autoridade Munisípiu Bobonaro ba Asuntu Sosiál, Júlio Carvalho Caero, konsidera atividade ne’e importante tebes tanba dalabarak Ema ho Defisiénsia sira sempre hetan diskriminasaun iha sosiedade nia leet.
“ita espera ho atividade sira-ne’e ba oin labele mosu diskriminasaun iha ita-nia leet, tanba ita haree labarik idade minoridade sira-ne’e, kuandu hasoru buat hanesan sira goja no buat seluk tan, ne’ebé favor ida respeitu sira tanba sira ho kondisaun hanesan mós nafatin iha vontade,” nia hateten.
Enkuantu atividade ne’e partisipa husi membru Asosiasaun Halibur Ema ho Defisiénsia Rejiaun Oeste (AHDRO) Munisípiu Bobonaro, estudante Eskola Sekundariu Jerál Númeru I Dom Martinho da Costa Lopes Maliana, joven no partisipasaun sira.
Notísia relevante: Governu-UNICEF lansa fatin asesibilidade públiku ba ema ho difisiénsia
Jornalista: Sérgio da Cruz
Editór: Evaristo Soares Martins
