OÉ-CUSSE, 03 Dezembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) disponibiliza nesesidade bázika ba ema ho defisiénsia (EhD) no vulneravel na’in-120 iha suku Abani no Malelat, iha sub-rejiaun Pássabe.
“Ha’u mai lori hahán uitoan atu tulun imi hodi atende netik nesesidade uma laran, tanba ho situasaun ne’ebé imi enfrenta, persiza tau atensaun mós husi parte Governu”, Rogério Lobato dehan iha ámbitu distribuisaun ai-han ne’ebé hala’o iha merkadu tradisionál Pássabe.
Iha biban ne’e, Xefe suku Abani, Carlos Elo, rekomenda ba autoridade RAEOA bainhira hala’o asaun karidade presiza koordena ho autoridade lokál, nune’e bele prepara lista vulneravel no ema ho defisiénsia iha suku no aldeia.
Notísia relevante: PN felisita Ema ho Defisiénsia iha Timor-Leste
“Ami agradese tanba bele halo karidade ba ita-nia komunidade, liuliu [sira ne’ebé] konsidera laiha kbiit, maibé sujere de’it katak foos [saku] 120 ne’e la sufisiente ba postu Pássabe, tanba orsida ami fahe ba suku rua ne’e mak la to’o. Komunidade deskonfia fali autoridade lokál sira mak halo manipulasaun ka sistema familiarizmu, ida-ne’e ami lakohi atu akontese, entaun ami tenke rejista ema 120 de’it [mak simu] no labele liu”, nia hato’o.
Tanba ne’e, nia rekomenda atu iha futuru apoia nesesidade bázika tenke simu dadus husi autoridade lokál sira iha suku idaidak atu hatene na’in hira mak sai benefisiáriu ba ajuda umanitária ne’e.
“Lista ami seidauk iha, entaun ami sei identifika loloos tanba ita labele oferese ba sira-ne’ebé kondisaun normál, maibé sei identifika ema ho defisiénsia no vulneravel. Liuhusi konkordánsia katak suku Abani, aldeia Haemnanu, hetan [foos saku] 20, aldeia Pássabe hetan 20, Naetuna 15 no seluk ba suku Malelat”, nia informa.
Adelina Lafo husi suku Abani, nu’udar vulneravel promete sei la fa’an tutan foos ne’ebé simu ba ema seluk, maibé uza ba konsumu uma laran nian.
“Horisehik xefe aldeia aviza ami atu hein autoridade mai vizita Pássabe, ne’ebé ami hein la saugate, tanba fó ami foos, supermie, no ai-han seluk tan. Ida-ne’e sasán Estadu nian ne’ebé ami sei uza ba ami-nia nesesidade la’ós atu fa’an fali ba ema seluk”, nia dehan.
Notísia relevante: RHTO konsidera investimentu Governu ba EhD hahú la’o di’ak iha TL
Nesesidade bázika ne’ebé oferese ba ema ho defisiénsia no vulneravel sira mak hanesan foos, supermie, biskuit, susubeen, kafé, masin-midar no seluk tan.
Jornalista: Abílio Elo Nini
Editora: Maria Auxiliadora
