OÉ-CUSSE, 03 Dezembru 2024 (TATOLI) – Família 131 iha aldeia Pássabe, suku Abani sub-rejiaun Pássabe enfrenta problema falta bee-moos, tanba ne’e líder suku solisita ba Prezidente Autoridade Rejiaun Administrativa Espesiál Oé-Cusse Ambeno atu haree kestaun ne’e.
Xefe bairru Ato, iha suku Abani, Benedito Qene, dehan uma-kain 131 ne’e iha totál membru 534 ne;e kle’ur la asesu bee-moos, tanba tanke bee nakfera no pipa sira mós aat ona.
Nia lembra katak, iha tinan rua liubá, komunidade sei utiliza tanke bee ne’e, maibé tanba kualidade obra tanke ne’e la di’ak maka nakfera tiha.
Notísia relevante: Rogério Lobato halo diálogu ho komunidade iha Pássabe
“Tanke ne’e agora nakfera totál. Ami istori malu iha bairru tanba sé mak atu responsabiliza, entaun ami tenke bá buka bee-moos iha bee-matan sira no mota ho distánsia dook mak foin hetan bee”, nia relata iha ámbitu diálogu ho Prezidente Autoridade RAEOA, Rogério Lobato, no membru autoridade sira iha merkadu tradisionál Pássabe.
Xefe suku Abani, Carlos Elo, reforsa katak tanke bee-moos ne’ebé instala iha sub-rejiaun Pássabe maioria organizasaun naun-governamentál sira mak harii no kontinua eziste, maibé pipa balun mak aat ona.
Tuir nia, problema bee-moos la’ós aldeia Pássabe de’it mak enfrenta, maibé inklui aldeia Haemnananu, tanke sei iha maibé pipa mak aat ona, tanba ne’e komunidade barak mak konsumu bee-mota no balun bá buka iha bee-matan sira ho distánsia dook.
“Ha’u husu sei bele apoia netik pipa no di’ak liu dezloka SAS mai haree took, tanba agora tempu udan ona, maibé ami sei nafatin susar ba bee-moos”, nia rekomenda.
Notísia relevante: Presiza integra autoridade lokál iha sistema hodi reforsa kontrolu ba projetu sira
Hatán ba problema falta bee-moos, Prezidente Autoridade RAEOA, Rogério Tiago Lobato, hateten prezensa autoridade iha Pássabe atu rona direta povu nia preokupasaun sira kona-ba problema sosiál sira, nune’e bele hatama iha planu atu fó solusaun iha futuru.
“Ami-nia objetivu mai ne’e atu rona imi-nia lian, ita labele ko’alia de’it iha fatin, maibé tenke bá to’o baze atu haree saida mak akontese no enfrenta. Ha’u hanoin imi-nia preokupasaun sira-ne’e ha’u sei entrega ba diresaun sira atu mai haree no verifika hodi hatama iha planu, karik iha osan uitoan ita-bele rezolve”, nia dehan.
Jornalista: Abílio Elo Nini
Editora: Maria Auxiliadora
