OÉ-CUSSE, 02 Dezembru 2024 (TATOLI) – Autoridade lokál sira iha sub-rejiaun Pássabe husu ba Autoridade Rejiaun Administrativa Espesiál Oé-Cusse Ambeno (RAEOA) atu envolve sira iha sistema kontrolu ba projetu sira-ne’ebé implementa iha suku no aldeia, nune’e bele garante kualidade ba ezekusaun ba obra sira.
“Ami hakarak sujere ba Prezidente Autoridade atu envolve administradór postu no xefe suku sira hotu iha Oé-Cusse iha sistema kontrolu ba implementasaun projetu fíziku iha baze, nune’e garante finalizasaun projetu sira ho kualidade di’ak”, Jestór sub-rejiaun Pássabe, Paulino Marques, hato’o iha ámbitu diálogu ho autoridade RAEOA iha Pássabe.
Aleinde ne’e, nia sujere mós atu funsionáriu públiku ne’ebé destaka iha postu administrativu sira bele koopera di’ak liután iha prosesu atendimentu públiku nian.
Notísia relevante: Rogério Lobato halo diálogu ho komunidade iha Pássabe
Iha fatin hanesan, Xefe suku Malelat, José Marques, hateten projetu estrada ligasaun husi suku Malelat bá suku Ban-Afi no Lela-Ufe empreza seidauk finaliza, tanba ne’e husu atu halo fiskalizasaun, nune’e bele hatene kauza husi abandona obra ne’e.
“Iha suku Malelat autoridade anteriór abandona hela dalan husi Kusi atu mai Malelat, lahatene problema saida mak kompañia la halo finalizasaun. Tan ne’e, ami husu ba autoridade, liuliu Obra Públika atu mai haree tanba saida mak estrada ne’e la kontinua to’o finalizasaun”, nia kestiona.
Xefe suku Abani, Carlos Elo, reforsa tan katak bainhira la envolve autoridade lokál susar tebes atu garante kualidade projetu, tanba kontrolu iha baze ladún másimu.
“Karik bele autoridade RAEOA tenke tau mós xefe suku ho jestór sira iha sistema para bele kontrola projetu hothotu iha baze. Kuandu líder mak la tama sistema, ami ko’alia to’o kakorok maran mós sira [empreza] la rona no la konsidera. Ami sujere ida-ne’e tanba interese públiku katak obra halo iha suku tenke halo ho responsabilidade, tanba ne’e osan povu nian”, nia afirma.
Notísia relevante: PA RAEOA xamada kompañia rua loron 60 tenke finaliza estrada rurál Pássabe
Hatán ba rekomendasaun sira-ne’e, Prezidente Autoridade RAEOA, Rogério Tiago Lobato, konsidera tanba ne’e importante no sei koordena ho Diresaun Rejionál Infraestrutura no Ajénsia Dezenvolvimentu Nasionál (ADN).
“Ideia sira-ne’e he’e ha’u konkorda tanba kuandu ita atu kontrola kualidade esrada sira, ita tenke envolve iha Diresaun Infraestrutura hamutuk ho AND atu haree halo estrada ne’e di’ak ka la’e? No xefe suku observa obra ne’e la’o ka la’e? Maibé, xefe suku sira mós bele fó sira-nia hanoin, ami nakloke atu rona imi, tanba xefe suku sira mak moris iha baze. Estrada kuandu ladi’ak, xefe suku mak sei preokupa, ne’ebé ha’u ko’alia ho Obra Públika atu haree imi-nia sujestaun ne’e”, nia realsa.
Kona-ba projetu ne’ebé abandonadu, oras ne’e Diresaun Rejionál Infraestrutura sira hamutuk ho ADN kontinua halo fiskalizasaun atu rekolla obra sira-ne’ebé implementa husi autoridade anteriór.
“Ha’u hanesan Prezidente Autoridade, osan ne’ebé iha ami selu de’it tusan ne’ebé administrasaun sesante sira halo ona obra maibé seidauk selu. Tusan ne’e komesa husi 2017 to’o agora, projetu 100-resin mak seidauk remata. Tan ne’e, ADN ho Obra Públika kontinua verifika obra hotu atu selu ne’e oinsá? Ha’u labele foti osan bá selu de’it, maibé tenke haree nia progresu serbisu”, dehan.
Notísia relevante: Kompañia Asistono ho CP kontinua reabilita estrada rurál iha Pássabe
Jornalista: Abílio Elo Nini
Editora: Maria Auxiliadora
