OÉ-CUSSE, 04 Dezembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) apoia nesesidade bázika ba ema ho defisiénsia (EhD) no vulneravél 100 iha suku Bobometo, Usitasa’e no Usitaqueno, iha sub-rejiaun Oésilo.
Sasán ne’ebé disponibiliza ba ema vulneravel sira ne’e mak hanesan foos, supermie, susu-been, bolaxa no ai-han seluk tan.
“Ami iha kooperasaun ho MSSI hodi fahe uitoan [nesesidade bázika] iha Pássabe. Ohin, iha Oésilo ne’e fó ba ema kbiit-la’ek no ema ho defisiénsia. Tuir planu MSSI, sei apoia tan foos saku 500 atu fahe ba inan-aman sira iha suku hotu. Apoia ne’e la’ós ho sasán barak, maibé ne’e hanesan Governu nia kbiit mak hanesan ne’e atu tulun ita-nia maluk sira-ne’ebé presiza loos”, Prezidente Autoridade RAEOA, Rogério Lobato dehan iha Oésilo.
Notísia relevante: EhD no vulneravel 120 iha Pássabe hetan apoiu nesesidade bázika
Nia husu ba benefisiáriu sira atu labele fa’an sasán ne’ebé simu, tanba sasán ne’e mai husi Estadu. “Ami entrega tiha, orsida to’o uma ita fa’an fali hodi buka osan atu atende fali ba lia. Ne’e labele, Governu fó imi atu han, ne’ebé labele fa’an atu hetan lukru seluk”, nia aviza.
Jestór sub-rejiaun Oésilo, Benedito Ulan, dehan maske ho kondisaun udan no estrada ladún di’ak, maibé prezidente autoridade ho ekipa tomak konsege hala’o vizita bá to’o komunidade nia hela fatin.
“Ha’u lori suku tolu nia naran agradese ba ai-han sira ohin entrega ona. Ami laiha buat ida, só agradese, tanba ohin mós ita-nia komunidade hein dezde meiudia to’o kalan atu rona polítika ka programa saida mak autoridade hato’o iha baze”, nia relata.
Rekorde katak autoridade RAEOA apoia antes ona nesesidade bázika ba ema ho defisiénsia no vulneravel na’in-120 iha suku Abani no Malelat, iha sub-rejiaun Pássabe.
Notísia relevante: Rogério Lobato promete rezolve problema infraestrutura bázika iha sub-rejiaun sira
Jornalista: Abílio Elo Nini
Editora: Maria Auxiliadora
