BOBONARO, 04 dezembru 2024 (TATOLI) – Komunidade aldeia Moleanan, suku Ritabou, postu administrativu Maliana, munisípiu Bobonaro, preokupa ho implementasaun projetu reabilitasaun estrada ne’ebé responsabiliza husi Empreza Internasionál Bina Mitra Indohsejatera, tanba bainhira udan estrada laran nakonu tahu no be’e hodi prezudika movimentasaun tranporte públiku no privada husi aldeia ba kapitál munisípiu.
Komunidade Bernadina Bete Araújo, informa, kondisaun estrada ne’e iha tempu udan difikulta tebes sira atu asesu ba merkadu Maliana Vila.
Notísia relevante: Komunidade espera Bina Mitra ezekuta projetu estrada Maliana I ho kualidade
“Ami feto, faluk tan hanesan atu lori moto-tahan ba merkadu la’o la di’ak, ho motór mós ladi’ak, tahu-belit halo karreta ho motór rungu-ranga de’it, ami husu halo lalais ona, labele mai ke’e estraga tiha haree hanesan promosi de’it,” nia informa ba jornalista sira iha terrenu, kuarta ne’e.
Xefe aldeia Mole-Anan, Aquito Leto, reforsa kondisaun estrada ne’e difikulta mós profesór, estudante no funsionáriu sira atu halo sira-nia atividade iha oras serbisu.
Antes ne’e, nia parte hasoru ona jestór projetu hodi informa kona-ba kondisaun no preokupasaun komunidade nia, maibé nia haktuir PT BMS labele responde urjénsia ho razaun limitasaun materiál liukiu kareta tanba tuir lei empreza internasionál ida atu hatama karreta mai territóriu Timor-Leste presiza hetan legalidade.
“Durante ne’e ita-nia komunidade barak mak dalaruma monu, maski monu ne’e sira la hetan dezastre ke boot, maibé loron-loron kuandu udan ne’e sempre monu, ne’e foin udan loron hira mak prezudika tiha ne’e, se la halo intervensaun lalais ba oin sei grave liután, ha’u ko’alia tanba lakohi komunidade hetan dezastre impaktu ba nia vida,” nia hakotu.
Antes ne’e Prezidente Autoridade Munisípiu Bobonaro, Alexandrino Pires, fó ona atensaun ba PT BMS atu aselera progresu servisu, tanba projetu halo bee tama komunidade nia uma hanesan iha parte Igreja Santa Cruz Maliana no ospitál tuan.
Enkuantu tuir Observasaun Jornalista TATOLI iha terrenu nota katak, ekipamentu PT BMS hahú kee ona bee-dalan no ateru rai-henek, fatuk iha estrada área bairru Rokon ba rotunda Maliana, parte bairru Sene no bainhira finaliza sei kontinua ba fatin seluk tan.
Notisía relevante: Bina Mitra hahú reabilita estrada trosu ba bairru iha Maliana
Jornalista: Sérgio da Cruz
Editór: Evaristo Soares Martins
