DILI, 06 dezembru 2024 (TATOLI)–Ministru Juventude Desportu, Arte no Kultura, Nelyo Isaac, informa, alteta 702 rejistadu partisipa iha jogu Komunidade País Língua Portugeza (CPLP), ne’ebé sei realiza iha loron 17 to’o 26 jullu 2025.
“Ami prepara iha infraestrutura balun ne’ebé kampu balun ita presiza pinta, ita mós halo akizasaun hodi sosa ekipamentu hodi ajuda ba jogu ne’e rasik. Depois fó asesoens ba otelaria sira. Ita preparadu simu delegasaun kontijénsia husi nasaun CPLP,” Ministru hateten ba Agência Tatoli, iha resintu Ministériu Juventude Desportu, Arte no Kultura (MJDAK), sesta ne’e.
Durante eventu boot ne’e sei halo promosaun ba identidade kulturál inklui turizmu iha Timor-Leste.
“Iha oportunidade ita mós dezenvolve turizmu no promove identifika kulturál ba país ne’ebé iha CPLP ne’e. Espera katak liuhusi jogu CPLP ne’ebé Tirilolo sai uma-na’in ne’e bele sai sidadaun ne’ebé amigável ba bainaka hotu iha eventu referidu,” nia akresenta.
Notísia relevante : KM aprova rezolusaun hodi kria komisaun eventuál interministeriál ba jogu CPLP iha 2025
Jogu CPLP sei uza kampu hotu ne’ebé iha, nune’e ekipa responsável sira daudaun ne’e hao hela preparasaun.
“Hanesan kampu iha Ermera, estádiu munisipál ne’e la’ós ba jogu futeból nian tanba kondisaun ladún di’ak. Maibé sei hadi’a no iha fulan-janeiru nia-laran hahú book infraestrutura hanesan kampu sira ne’ebé reaabilita de’it. Kampu Becora sei sai university academic ba kampu kompetisaun nian, ida-ne’e ba futeból. Ba karate, taekwondo ne’e joga GMT,” nia hato’o.
Aleinde ne’e, basketból mós joga iha GMT no bele joga mós iha resintu MEJDAK, jogu xadres sei joga iha CCD, tenis meza iha Universidade Nasionál Timor-Lorosa’e (UNTL) nian, jogu pantai iha Lecidere, halai taru no lompat jauh sei halo iha GMT.
Sei estabelese mós Sekretariadu jogu CPLP hodi hasai informasaun ofisiál kona-ba eventu ne’e.
Ministru reforsa, téknikamente preparadu, ema profesionál ba árbitu husi Portugal no Brazil mak sei halo preparasaun hamutuk ho Federasaun no iha fevereiru ekipa mai.
“Neste momentu país sira balun rejistadu ona. Pur ezemplu nasaun iha CPLP balun mai ho atleta 101, balun mai ho 70, iha mós 35, no modalidade hamutuk 70 ona, ida-ne’e ba jogu kompletu nian. Ne’ebé totál atleta hamutuk 702 rejistadu konfirmadu. Ba ita-nia rasik janeiru no fevereiru ita hahú halo selesaun,” nia katak.
Governante ne’e orgullu tanba ba dahuluk Timor-Leste sai uma-na’in ba jogu CPLP.
“Ha’u iha esperansa katak jogu sira-ne’e ita raut tasu, ita manán hotu tuir ita-nia preparasaun ne’ebé iha, nune’e iha futuru bele kompete iha jogu internasionál sira,” nia tenik.
Jornalista : Osória Marques
Editora : Julia Chatarina
