COVALIMA, 06 Dezembru 2024 (TATOLI) – Funsionáriu públiku na’in-12 ho idade 65 iha Administrasaun Munisípiu Covalima (AMC) tama iha lista reforma obrigatória.
Diretór Servisu Administrasaun Munisipál no Rekursu Umanu, José Manuel Gonçalves, dehan molok ne’e rekursu umanu identifika ona funsionáriu idade entre 60 no 65 hamutuk 34 ne’ebé tama iha lista reforsa obrigatóriu, maibé hafoin reverifika haree ba idade 65 iha na’in-10-resin mak tama iha lista.
“Ita haree ba lei Komisaun Funsaun Públika (KFP) ne’ebé Prezidente Repúblika (PR), José Ramos Horta promulga katak, funsionáriu ne’ebé tama iha lista reforma obrigatória ho idade 65”, José Gonçalves relata iha AMC, ohin.
Dirijente ne’e dehan autoridade Covalima anunsia konkursu públiku ba ajente administrasaun públika bazeia ba despaixu númeru 13862/2024/CFP. Tanba ne’e, iha Novembru ne’e, servisu munisipál halo ona rekrutamentu ba funsionáriu sira ba pozisaun sira hanesan enjeñeiru sivíl grau C na’in-neen, enjeñeiru arkitetura grau C na’in-neen, ofisiál finansa grau C na’in-neen, tékniku apoiu servisu finansa munisipál grau D na’in-16 no apoiu administrasaun jerál grau E na’in-17.
Vaga ne’e parte ida halo preparasaun relasiona ho promulgasaun Lei Reforma Obrigatória ba funsionáriu públiku no ajente sira ho idade 65. Prosesu rekrutamentu seidauk taka sai rezultadu selesaun dokumentu tanba prosesu hala’o iha nasionál”, dehan.
Notísia relevante: Funsionáriu AMC na’in-34 tama iha lista idade reforma
Kandidatu sira ne’e bainhira pasa teste sei presta sira-nia serbisu iha Servisu Munisipál Finansa, Administrasaun no Rekursu Umanu, Servisu Munisipál Planu Integradu no Dezenvolvimentu, Servisu Munisipál Obra Públika, Servisu Munisipál Asaun Sosiál no koloka bá to’o iha administrasaun postu hitu iha Covalima.
Dadus funsionáriu públiku ne’ebé presta serbisu ho rejime jerál hamutuk 321, funsionáriu rejime espesiál 21, ajente administrasaun 44 no funsionáriu kazuál 211 no funsionáriu ne’ebé rejista reforma obrigatória 12.
Lembra katak Parlamentu Nasionál, aprova, iha 07 Outubru, proposta-lei númeru 11/VI(1a)-Autorizasaun lejislativa iha matéria fixasaun limite idade ba relasaun serbisu funsionáriu públiku no ajente administrativu iha finál globál ho votu a favór 37, kontra 0 no abstensaun tolu.
Notísia relevante: KFP prioriza reforma administrasaun públika-halo rekrutamentu funsionáriu foun iha 2025
Jornalista: Celestina Teles
Editora: Maria Auxiliadora
