OÉ-CUSSE, 06 Dezembru 2024 (TATOLI) – Organizasaun Internasionál ba Migrasaun (OIM) no Sekretaria Estadu Protesaun Sivíl (SEPS) inaugura, ohin, edifísiu ba Sentru Evakuasaun ba vítima dezastre naturál iha suku Cunha, sub-rejiaun rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
Ofisiál ne’ebé Responsavel ba Unidade Emerjénsia no Pós-Krize OIM, Ayu Hannah Zaimah, informa katak renovasaun ba Sentru Evakuasaun ida ne’e hetan finansiamentu husi Bureau for Humanitarian Assistance (BHA, sigla inglés) husi USAID, ho esperansa ba dahuluk mak inkluzivu, tanba ema ho defisiénsia (EhD) bele asesu bá sentru ne’e.
Nomós fatin ne’e prontu atu fasilita bainhira akontese dezastre, komunidade sira bele hatene ona hodi hakat bá iha sentru ne’e.
“Tanba ne’e mak ita haree husi pontu entrada sira dalan tama mai iha ona sinál sira atu mai iha Sentru Evakuasaun ne’e. Ita espera sentru ne’e la’ós utiliza de’it ba evakuasaun, maibé komunidade bele sente seguru no asegura sira husi risku sira tantu ba dezastre naturál komu asuntu seguransa nian”, dehan.
Notísia relevante: OIM no APC Oé-Cusse halo simulasaun hodi responde ba dezastre naturál
Foto Tatoli/Abílio Elo Nini
Iha biban ne’e, Sekretáriu Estadu Protesaun Sivíl, Domingos Mariano dos Reis, agradese ba kontribuisaun OIM ba protesaun sivíl iha país, tanba antes ne’e iha ona nota entendimentu no OIM prontu atu apoia Timor-Leste.
“Ohin, iha entrega Sentru Evakuasaun maske nia medida ne’ebé ki’ik, maibé ida-ne’e exemplár tebes. Kuandu akontese dezastre iha RAEOA, ita agora iha ona fatin preparadu iha suku Cunha”, nia salienta.
Tuir nia, asaun ne’ebé baibain APC halo atuasaun mak fó resposta ba situasaun emerjénsia iha pontu tolu importante mak dahuluk evakua uma vítima sira bá fatin ne’ebé seguru; daruak mak apoia emerjénsia ba vítima sira kauza husi dezastre; no datoluk halo levantamentu dadus depois rekupera.
“Ohin, ita simu sentru evakuasaun ne’e, la’ós iha RAEOA de’it, maibé tempu badak sei iha Lospalos, Kailaku husi parte Bobonaro nian sei simu no protesaun sivíl la’ós ida ne’e de’it mak sai hanesan fasilidade sufisiente. Ita prepara iha tinan oin sei konstrui edifísiu protesaun sivíl iha munisípiu hotu. Orsamentadu ona no nia prosesu iha ona CNA. Tempu badak ita sei estabelese ita-nia edifísiu autoridade protesaun sivíl ne’ebé akomoda diresaun hotu, inklui mós sentru evakuasaun ho medida boot atu responde ba emerjénsia iha munisípiu sira”, nia promete.
Notísia relevante: APC Oé-Cusse sei estabelese sentru evakuasaun provizória iha Bansone
Edifísiu ba Sentru Evakuasaun ne’e ho valór kontratu hamutuk rihun $19, ne’ebé finansia husi Bureau for Humanitarian Assistance ho durasaun kontratu fulan haat, hahu Agostu to’o Dezembru 2024.
Jornalista: Abílio Elo Nini
Editora: Maria Auxiliadora
