BOBONARO, 09 dezembru 2024 (TATOLI) – Eleitór ferik no katuas sira iha munisípiu Bobonaro tenke forma naruk to’o dudu-malu iha edifísiu Sekretariadu Tékniku Administrasaun Eleitorál (STAE) atu halo Atualizasaun Baze de Dadus hodi asesu kartaun eleitorál foun ho baze biométriku.
Komunidade suku Lahomea, Alcino Barreto, husu ba STAE atu loke sentru atendimentu to’o iha nivel postu nune’e bele fasilita eleitór sira halo RE-ABD iha fatin besik.
Notísia relevante: STAE Bobonaro lansa REABD iha aldeia Bour prepara ba eleisaun suku
“Agora tempu udan, ami servisu barak, agora ami forma mós naruk, ema barak tan hanesan ne’e ami atu halo nusá, sistema agora ne’e ladún di’ak ba ami, ferik ho katuas tán forma hanesan ne’e, sorti la udan, udan mai forma mós ladi’ak, ne’ebé halo nusá mak governu bele tau-matan mai ami nune’e ami bele hetan kartaun ne’e, tanba ami hela dook, selu ojek mak mai iha ne’e,” nia informa ba jornalista sira iha Edifísiu STAE Munisípiu Bobonaro, segunda ne’e.
Alende ne’e komunidade suku Holsa, Antonio Soares, senti triste tanba sai husi uma mai to’o edifísiu STAE tuku 05:00 madrugada tan de’it hakarak forma iha liña oin, maibé tuku 09 dader ona mós seidauk bele tama ba iha fatin atendimentu.
“Ami ema barak loos, ne’ebé tama hotu ladi’ak, fatin kloot, depois mesin iha laran ne’e mós ida de’it, entaun bele tama laran mós tuur hein kleur mak foin foto, ne’ebé to’o agora ami lubuk ida ferik ho katuas sira sei antrian hela iha li’ur,” nia katak.
Ba kestaun ne’e, Diretór STAE Munisípiu Bobonaro, Mariano Viegas Amarál, rekoñese eleitorál sira forma naruk duni, tanba atendimentu sei sentraliza de’it iha nivel munisípiu ho razaun laiha orsamentu.
Nia konfirma, iha atendimentu ne’e fó liu prioridade ba eleitór sira ne’ebé mai husi postu administrativu dook, ferik-katuas no Ema ho Defisiensia ne’ebé tuir tarjetu kada loron simu ema na’in 100.
“Ita nia espetativa ne’e hakarak simu eleitór ne’e dadeer 50, lokraik 50, maibé realidade liu tiha husi ita nia espetativa, tanba komunidade barak no barak liu mai husi postu administrativu, entaun hakarak lakohi ita tenke halo atendimentu liuhusi ita nia tarjetu, kuandu segunda hanesan ita bele atende to’o 150,” nia katak.
Diretór ne’e sekunda, planu ba tinan 2025 STAE sei implementa atividade rejistu movél hodi hakbesik atendimentu to’o nivel postu administrativu no sentru suku ne’ebé halibur komunidade barak.
STAE hahú produs kartaun eleitorál ho baze biometriku, maibé kartaun eleitorál tuan mós sei validu hela ba eleitór sira atu aplika iha kualker kriteria hotu-hotu inklui asesu direitu subsidiu idozu no invalidez.
Mariano subliña, prosesu atu hetan kartaun ho baze biometriku lori loron ida ka rua tanba sei hein lisensa produsaun husi server nasionál.
Hafoin lansamentu RE-ABD kartaun eleitorál hanesan Baze Biometriku iha loron 06 novembru ne’e to’o agora, STAE rejista ona eleitór hamutuk 1,634, kompostu husi eleitór foun 162, komposta husi mane 72, feto 90 no eleitór tuan 1,472, mane 751 no feto 721.
Notísia relevante: STAE Bobonaro ho líder lokál sira diskute preparasaun eleisaun suku
Jornalista: Sergio da Cruz
Editór: Evaristo Soares Martins
