OÉ-CUSSE, 11 Dezembru 2024 (TATOLI) – Servisu Saúde Rejiaun Administrativa Espesiál Oé-Cusse Ambeno (RAEOA) rejista, to’o Dezembru 2024, númeru VIH/Sida sa’e ba 81, informa Sekretáriu Rejionál ba Asuntu Saúde, Luís de Jesus Neno.
“Iha Novembru sei iha 78, maibé to’o Dezembru ne’e sa’e tan ema na’in-tolu. Ida-ne’e aas tebes”, afirma iha Oé-Cusse, ohin.
Kazu 81 ne’e deteta iha instalasaun saúde sira iha sub-rejiaun Oésilo, Pássabe, Nítibe no Pante Makasar. “Pasiente balun sei joven, balun kaben-na’in, inklui menoridade”, adianta.
Notísia relevante: Númeru VIH/Sida iha Oé-Cusse sa’e ba 78
Seropozitivu hirak-ne’e daudaun balun hala’o hela tratamentu iha instalasaun saúde no seluk lakohi koopera, katak fiar liu ba ai-moruk tradisionál, maibé husi parte saúde kontinua halo komunikasaun nune’e bele hetan tratamentu rotina.
Tan ne’e, tuir Luís Neno, polítika atu redús númeru kazu ne’e, iha 2025, Servisu Saúde Oé-Cusse sei hamutuk ho lidér komunitáriu no parte igreja hodi kontinua fahe infromasaun ba komunidade no parte saúde mós sei halo sensibilizasaun iha fatin públiku, inklui iha instituisaun públika sira.
Notísia relevante: ONG Estrela+ identifika seropozitivu 263 hetan stigma no diskriminasaun husi sosiedade
“Ita espera katak, ita sei halo atividade oioin, tantu promosaun, deteta, nune’e bele hetan kazu pozitivu. Karik bele halo akonsellamentu ba pasiente sira atu kontinua hala’o konsulta bá instalasaun saúde sira atu hanaruk vida, tanba ai-moruk ba moras VIH/Sida seidauk iha. Tanba ne’e, importante ba ami atu serbisu maka’as hodi hamenus tranzmisaun virus ne’e ba komunidade”, nia subliña.
Jornalista: Abílio Elo Nini
Editora: Maria Auxiliadora
