OÉ-CUSSE, 13 Dezembru 2024 (TATOLI) – Jestór Sub-rejiaun Pássabe, Paulino Marques, preokupa ho kondisaun kazerna ba membru Polísia Nasionál Timor-Leste (PNTL) Eskuadra Sub-rejiaun Pássabe, tanba la dignu ba sira atu hela.
“Ami husu tau netik atensaun hodi hadi’a kazerna PNTL Eskuadra Pássabe, ne’ebé oras ne’e dodook ona no la dignu nu’udar hela fatin ba membru seguransa nasaun nian iha fatin ne’e”, Paulino Marques hateten iha Pássabe.
Nia lembra katak kazerna ne’e Governu Indonézia mak husik hela no durante tinan 24 nia laran nunka hetan renovasaun ka halo manutensaun. “Ha’u reprezenta populasaun iha suku Malelat no Abani espera Governu bele konsidera ami-nia rekomendasaun ne’e”, dehan.
Notísia relevante: Uma-kain 131 iha aldeia Pássabe enfrenta problema falta bee-moos
Xefe suku Abani, Carlos Elo, reforsa katak Ministériu Interiór presiza konsidera tanba membru PNTL iha arma nasaun nian, tanba ne’e tenke fó fatin ida dignu ba sira atu hela.
“Tanba ita-nia seguransa iha eskuadra Pássabe, ita haree [uma ne’e] la merese duni atu sira hela, tanba sira-nia fatin ne’e dezde Indonézia kedas no agora ameasadu didin sira atu monu, kakuluk ku’ak. Ami preokupa tanba sira iha arma nasaun nian, entaun sira tenke iha fatin dignu atu hela. Dalaruma husi rai viziñu Indonézia mai vizita, entaun ida-ne’e hatudu imajen ladún di’ak, tanba ne’e ita-nia seguransa nasaun presiza fatin dignu”, nia husu.
Notísia relevante: Autoridade Pássabe husu Ministériu Interiór aumenta postu UPF iha fronteira
Hatán ba problema ne’e, Prezidente Autoridade RAEOA, Rogério Tiago Lobato, promete sei apoia no iha tempu badak sei husu ba Diresaun Rejionál Infraestrutura hodi halo levantamentu ba uma.
“Ha’u hatene tanba imi iha Pássabe dook, ne’ebé dalaruma ami ladún tau-matan. Tanba ne’e, ha’u sei haree osan iha uitoan, sei husu Diresaun Obra Públika atu mai haree, tanba imi iha kilat no persiza tau iha fatin di’ak, la’ós udan tau imi ba husu fatin iha Padre paróku ne’e labele. Ha’u hato’o ba Ministériu Interiór katak RAEOA iha osan uitoan, sei halo imi-nia kazerna ne’e”, nia garante.
Jornalista: Abílio Elo Nini
Editora: Maria Auxiliadora
