Xina kompromete sei kontinua apoiu TL
DILI, 17 dezembru 2024 (TATOLI)-Prezidente Parlamentu Nasionál, Maria Fernanda Lay, hateten Governu Xina kompromete sei kontinua apoiu dezenvolve Timor-Leste ba futuru.
Maria Fernanda Lay, hato’o asuntu ne’e bainhira simu vizita hosi Vise Ministru Negósiu Estranjeiru no Kooperasaun Xina, Sun Weidong, ho delegasaun, iha Parlamentu Nasionál.
Notísia Relevante :Xina kontinua hatudu vontade apoia ba Timor-Leste nia dezenvolvimentu
“Vizita espesiál tebes no Embaixadór Xina mós iha relasaun di’ak ho ita-nia Parlamentu, maneira bele halo aranju hodi bele hetan vizita importante, klaru katak, aleinde ita agradese kooperasaun desde ita-nia indepedénsia to’o agora, ita espera iha futuru iha planu estratéjiku balun ne’ebé ita bele konta ho partisipasaun sira-ni’an. No ha’u husu mós se bele iha kooperasaun ne’e ita bele dezenvolve área estratéjika balun ne’ebé bele kria kampu traballu ba ita-nia joven,” Prezidente Parlamentu Nasionál ne’e hateten.
Nia dehan, durante enkontru ne’e parte rua koa’lia mós ko-naba kooperasaun iha área agrikultura, irrigasaun, telekomunikasaun, eletrisidade no seluk tan.
“No ha’u mós husu espesialmente ba área zona eskluziva Oé-Cusse nian, ne’ebé iha esperiensia, ha’u bá Moçambique sira dezenvolve planu ne’e lais tebes bele ajuda no kria mós ita-nia área indústriál iha ita-nia portu Tibar, hodi bele kria kampu traballu ba ita-nia ema, ein vez ita-nia joven sai ba rai-liur,” Nia hateten.
Governu Xina liuhosi ninia Vise Ministru Negósiu Estranjeiru no Kooperasaun Xina, Sun Weidong, espera partisipasaun Timor-Leste nian iha ASEAN sei kontribui estabilidade rejiaun sudeste aziátiku.
“No mensajen ida di’ak tebes mak nia hateten, iha kooperasaun entre país tenke iha sensiriedade no respeitu mútuo entre ema no la’ós de’it entidade, hodi ita bele dezenvolve situasaun ida win-win solution ba parte rua iha kooperasaun ne’e,” tenik tan.
Notísia Relevante :Xina disponibiliza komputadór lima ba MCI
Jornalista: Nelson de Sousa
Editór: Agapito dos Santos
