DILI, 19 dezembru 2024 (TATOLI)—IX Governu Konstitusionál hato’o Boas Festas do Santo Natál ba timoroan tomak ho mensajen dame, esperansa no kompromisu ba futuru país.
Tuir Governu, Natál hanesan tempu reflesaun no renovasaun, nune’e Governu reafirma ninia kompromisu atu kontinua serbisu ho dedikasaun, responsabilidade no transparénsia hodi hatán ba nesesidade populasaun nian.
“Hamutuk ho solidariedade no determinasaun, ita bele hasoru dezafiu no konkretiza mehi hodi sai nasaun ida-ne’ebé forte no dezenvolvidu liu. Natál ida-ne’e nu’udar tempu atu selebra konkista, reflete kona-ba dezafius no liu-liu hafoun hikas kompromisu atu serbisu ba moris di’ak timoroan tomak nian. Governu sei kontinua halo esforsu hotu-hotu atu harii futuru ida-ne’ebé justu, inkluzivu no prósperu liu ba jerasaun ohin loron no futuru,” Ministru Prezidénsia Konsellu Ministru no Portavós IX Governu Konstitusionál, Agio Pereira, hateten, liuhusi nota ne’ebé Agência Tatoli asesu kinta ne’e.
Notísia relevante : Palásiu Prezidensiál fahe pakote Natál ba dadur na’in-150 iha prizaun Gleno
Nia dehan, tinan 2024 marka ho esforsu hamutuk ida atu hadi’a dezafiu sira iha pasadu no lansa baze ba futuru ida-ne’ebé promisór liu. Ho foka ba implementasaun reforma estruturante dezenvolvimentu infraestrutura estratéjika, kreximentu ekonómiku no moris di’ak sosiál, Governu serbisu ona atu harii Timor-Leste ida ne’ebé unidu, prósperu no justu liu, iha ne’ebé sidadaun ida-idak hetan oportunidade moris ne’ebé di’ak-liu.
IX Governu Konstitusionál hato’o ba ema hotu ne’ebé hela iha Timor-Leste no ba timoroan hotu ne’ebé hela iha rai-li’ur, ksolok Natál no prósperu Tinan Foun, nakonu ho dame, saúde no esperansa. Atu tinan 2025 sai hanesan tinan ba konkista foun sira, kresimentu no progresu ba Timor-Leste no ba família timoroan sira hotu.
Jornalista : Arminda Fonseca
Editora : Julia Chatarina
